දූෂණ විරෝධී පනතේ 89 වන වගන්තිය පරිදි සියලු ම මැතිවරණ අපේක්ෂකයන් තම නාමයෝජනාපත්‍ර භාර දෙන අවස්ථාවේ දී තමන්ගේ වත්කම් හා බැරකම් ප්‍රකාශයන් ද මැතිවරණ කොමසාරිස්වරයා වෙත භාරදිය යුතු වේ. මෙහි දි පනතේ 82 (2) ව්‍යතිරේඛය ප්‍රකාරව, ඡන්ද විමසීමේ දිනය ප්‍රකාශ කරනු ලබන දිනය දක්වා, අදාළ වර්ෂය සඳහා වූ වත්කම් හා බැරකම් ප්‍රකාශ සිදු කළ යුතු වේ.

අල්ලස් හෝ දූෂණ චෝදනා විමර්ශන කොමිෂන් සභාවේ රහසිගත හා බුද්ධි විමර්ශන ඒකකය වෙත ලද තොරතුරක් මත, කොමිෂන් සභාව විසින් කරුණු ඉදිරිපත් කිරීමෙන් අනතුරුව, ශ්‍රී ලංකා රේගුවේ නිෂ්කාශනය නොවූ රථ 07ක් රේගුව භාරයට ගැනීම සඳහා එම වාහනවල වර්තමාන හිමිකරුවන් 2024.08.13 වන දිනට පෙර අල්ලස් කොමිෂන් සභාව වෙත අදාළ රථ ඉදිරිපත් කිරීමට කොළඹ ප්‍රධාන මහේස්ත්‍රාත් තිළිණ ගමගේ මහතා විසින් 2024.08.06 වන දින නියෝග නිකුත් කර ඇත.

ඛනිජ තෙල් නීතිගත සංස්‌ථාවේ රැකියාවක් ලබාදෙන බවට පවසා රුපියල් ලක්ෂ හතක් අල්ලස් වශයෙන් ඉල්ලා අවස්ථා දෙකකදී ඉන් ලක්ෂ තුන බැගින් මුදල් ලබාගැනීමේ අධිචෝදනාවන්ට නිලන්ත එරික් පෙරේරා යන අයෙකු වරදකරු කරමින් 2024.08.08 දින කොළඹ මහාධිකරණ විනිසුරු ගරු ආධිත්‍ය පටබැඳිගේ මැතිතුමා විසින් දඩමුදල් සමග චූදිතට බරපතල වැඩ සහිතව සිර දඬුවම් නියම කර ඇත.

ජාතික රූපවාහිනී නාලිකාව, චන්ද්‍රිකා තාක්ෂණය ඔස්සේ මැද පෙරදිග සහ යුරෝපා රටවල විකාශනය කිරීම සඳහා ප්‍රසම්පාදන ක්‍රියාවලිය අනුගමනය කිරීමෙන් තොරව සහ නීත්‍යනුකූල ගිවිසුමක් අත්සන් කිරීමකින් තොරව, ඉතාලියේ ක්‍රියාත්මකවන "නෝවා විෂන් සැටලයිට්" ආයතනය වෙත විකාශන කටයුතු කිරීම සඳහා ලබාදීම හේතුවෙන් රජයට රුපියල් 3,454,279.37 ක පාඩුවක් සිදුකරමින් දූෂණය වරද සිදුකිරීම සම්බන්ධයෙන් ජාතික රූපවාහිනී සංස්ථාවේ හිටපු සභාපතිවරයෙකු වූ විමලසේන රූබසිංහ සහ හිටපු අධ්‍යක්ෂ ජනරාල්වරයෙකු වන දෙල්වක්කඩ ලියනගේ චන්ද්‍රපාල යන පුද්ගලයින්ට එරෙහිව වර්ෂ 2022 දී අල්ලස් කොමිෂන් සභාව විසින් නඩු පවරන ලදී.

පූර්වයෙන් රජයේ තනතුරු හෝ පදවි දරමින් සිටිය දී රජය මඟින් ලබාදුන් නිශ්චල හෝ චංචල දේපළ එම නිලතලවලින් ඉවත් වූ පසු නීත්‍යානුකූල නොවන ආකාරයට පරිහරණය කරන බවට වරින්වර අල්ලස් හෝ දූෂණ චෝදනා විමර්ශන කොමිෂන් සභාවට පැමිණිලි ලැබෙමින් පවතී.

අල්ලස් හෝ දූෂණ චෝදනා විමර්ශන කොමිෂන් සභාවේ රහසිගත හා බුද්ධි විමර්ශන ඒකකය වෙත ලද තොරතුරක් මත, කොමිෂන් සභාව විසින් කරුණු ඉදිරිපත් කිරීමෙන් අනතුරුව, ශ්‍රී ලංකා රේගුවේ නිෂ්කාශනය නොවූ ලෑන්ඩ් කෘෂර් රථ 05ක් සහ මිට්සුබිෂි මොන්ටේරෝ රථ 02ක් රේගුව භාරයට ගැනීම සඳහා එම වාහනවල වර්තමාන හිමිකරුවන් 2024.08.13 වන දිනට පෙර අල්ලස් කොමිෂන් සභාව වෙත අදාළ රථ ඉදිරිපත් කිරීමටත්, එම රථවලට අය විය යුතු රේගු ගාස්තු අය කරගැනීම සඳහා ශ්‍රී ලංකා රේගුවේ අධ්‍යක්ෂ ජනරාල්වරයාට හෝ ඔහුගේ නියෝජිතයෙකු වෙත එම රථ භාර ගැනීමට 2024.08.23 දින කොළඹ ප්‍රධාන මහේස්ත්‍රාත් අධිකරණයේ පෙනී සිටින ලෙස කොළඹ ප්‍රධාන මහේස්ත්‍රාත් තිළිණ ගමගේ මහතා විසින් 2024.08.06 වන දින නියෝග නිකුත් කර ඇත.

ශ්‍රී ලංකාව තුළින් අල්ලස හා දූෂණය වැළැක්වීම සඳහා වන “දුෂණ විරෝධී ජාතික ක්‍රියාකාරී සැලැස්ම, 2025-2029” සඳහා අදහස් හා යෝජනා ලබා ගැනීම මේ වන විටත් ආරම්භ කර ඇත.

ත්‍රිකුණාමලය ප්‍රදේශයේ කාන්තාවක විසින් කරන ලද පැමිණිල්ලකට අනුව පැමිණිළිකාරිය විසින් නඩත්තු සහ අපහාසය සඳහා රු. 80,000/- ක වන්දි මුදලක් ඉල්ලා මෙම ක්වාසි විනිසුරුවරයා වෙත නඩුවක් ගොණු කිරීමට අවශ්‍ය ලේඛන ලබාදී ඇති අතර එම වන්දි මුදල ලබා දීමට අවශ්‍ය කටයුතු කරදීම වෙනුවෙන් රු. 50,000/- ක අල්ලස් මුදලක් ඉල්ලා, ඉන් රු. 10,000/- ක මුදලක් ලබා ගැනීමේ චෝදනාව මත මාතලේ ප්‍රදේශයේ ක්වාසි විනිසුරුවරයෙක් 2024.07.30 වන දින ප.ව. 2.45 ට පමණ වරකාමුර ප්‍රදේශයේ සැකකරුගේ නිවසේ පවත්වාගෙන යන කාර්යාලයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

බිබිල, මැදගම ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, අත්අඩංගුවට ගන්නා ලද රා ප්‍රමාණය අඩුවෙන් සඳහන් කර අධිකරණයට කරුණු වාර්තා කිරීමටත්, අත්අඩංගුවට ගන්නා ලද සැකකරුවන්ගේ පෙර වැරදි සඳහන් නොකිරීමට සහ ඉදිරියේ දී මේ සම්බන්ධයෙන් අවශ්‍ය සහයෝගය ලබාදීම සඳහා රු. 3,000/- ක (තුන්දහසක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත බිබිල, මැදගම පොලිස් ස්ථානයේ පොලිස් කොස්තාපල්වරයෙකු 2024.07.30 වන දින ප.ව.4.15 ට පමණ මැදගම, නගරයේ පොදු වෙළඳ පොලෙහි ඇති පැමිණිලිකරුගේ කඩ කාමරය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

පොළොන්නරුව ප්‍රදේශයේ ව්‍යාපාරිකයකු විසින් කරන ලද පැමිණිල්ලකට අනුව, මහවැලි බී කලාපයට අයත් මඩකලපුව දිස්ත්‍රික්කයේ පිහිටි ජයමිණියාය වැවේ රොන් මඩ ඉවත් කර, එම රොන් මඩ නිස්සාරණය කර වැලි විකිණීමේ ව්‍යාපෘතියක් සඳහා පැමිණිලිකරුට හිමි පුද්ගලික සමාගම නමින් භූ විද්‍යා හා පතල් කැණීම් කාර්යාංශයෙන් ලබා ගත යුතු බලපත්‍රය ලබා දීම සඳහා රු. 1,500,000/- ක (රුපියල් ලක්ෂ පහළොවක) අල්ලස් මුදලක් තුටු පඬුරක් ලෙස ඉල්ලා ලබා ගැනීමේ චෝදනාව මත කරඩියනාරු ප්‍රදේශයේ දේශපාලන ක්‍රියාකරුවකුවන ව්‍යාපාරිකයකු, මඩකලපුව ලංකා බැංකු නගර ශාඛාව ඉදිරිපිට දී සහ රාජ්‍ය අමාත්‍යවරයකුගේ පුද්ගලික ලේකම්වරයකු, එම අමාත්‍යවරයාගේ මඩකලපුව පිහිටි කාර්යාලයේ දී 2024.08.01 දින පස්වරු 12.30 – 12.40 අතර කාලයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

හිඟුරක්ගොඩ ප්‍රාදේශීය ලේකම්වරයෙක් ලෙස කටයුතු කළ වඩුමේස්ත්‍රිගේ ගුණවර්ධන යන අය රජයට පාඩුවෙන ලෙස රජයේ ටෙන්ඩර් මාර්ගෝපදේශවලට පටහැනිව පරිගණක යන්ත්‍රයක් සහ වර්ණ මුද්‍රණ යන්ත්‍රයක් මිලදීගැනීමට තීරණය කිරීමෙන් සහ ඒ සඳහා මුදල් ප්‍රතිපාදන මුදාහැරීමෙන් අල්ලස් පනතේ 70 වෙනි වගන්තිය යටතේ වරදක් කරණ ලද බවට ඔහුට එරෙහිව අල්ලස් හෝ දුෂණ චෝදනා විමර්ෂණ කොමිෂන් සභාව විසින් 2010 මාර්තු 25 වන දින කොළඹ මහේස්ත්‍රාත් අධිකරණයේදී චෝදනා ගොණු කරණ ලදී.

2023 අංක 9 දරන දූෂණ විරෝධී පනතේ විධිවිධාන ප්‍රකාරව 2023/2024 වර්ෂයේ වත්කම් සහ බැරකම් ප්‍රකාශ කිරීමට නියමිත නිලධාරීන් ඇතුළු පුද්ගලයන්ගේ වත්කම් සහ බැරකම් ප්‍රකාශ අල්ලස් හෝ දූෂණ චෝදනා විමර්ශන කොමිෂන් සභාවේ නිල වෙබ් අඩවිය මඟින් ප්‍රසිද්ධ කිරීමේ කටයුතු මේවන විට ආරම්භ කර ඇත.