අල්ලස් කොමිෂන් සභාවට ලද පැමිණිල්ලකට අනුව රු. 80,000/- ක මුදලක් අල්ලස් ලෙස ඉල්ලා ලබා ගැනීමේ චෝදනාව මත, ශ්‍රී ලංකා ගමනාගමන මණ්ඩලයේ ප්‍රධාන කාර්යාලයේ සේවය කළ හිටපු ක්‍රීඩා අධීක්‍ෂණ නිලධාරියකු 2023.10.05 වන දින අල්ලස් හෝ දුෂණ චෝදනා විමර්ශන කොමිෂන් සභාවේ විමර්ශන නිලධාරින් විසින් අත්අඩංගුවට ගනු ලැබීය.

අල්ලස් හෝ දූෂණ චෝදනා විමර්ශන කොමිෂන් සභාව සහ එක්සත් ජාතීන් ගේ සංවර්ධන වැඩසටහන එක්ව ‘JURE’ ව්‍යාපෘතිය යටතේ මෙම කොමිෂන් සභාවේ නීති නිලධාරීන් හා විමර්ශන නිලධාරීන් සඳහා සැසි තුනකින් සමන්විත වැඩමුළුවක් 2023 සැප්තැම්බර් මස 2 වන දින කොළඹ කිංස්බරී හෝටලයේ දී පවත්වන ලදි.

නොච්චියාගම ප්‍රදේශයේ පුද්ගලයකු විසින් සිදු කරන ලද පැමිණිල්ලකට අනුව, අල්ලස් ලෙස මුදල් ඉල්ලා ලබා ගැනීමේ චෝදනාව මත ශ්‍රී ලංකා මහවැලි අධිකාරිය -නොච්චියාගම ඒකක වැඩබලන ඒකක කළමණාකරු2023.09.20 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගනු ලැබින.

අල්ලස් හෝ දූෂණ චෝදනා විමර්ශන කොමිෂන් සභාව සහ එක්සත් ජාතීන් ගේ සංවර්ධන වැඩසටහන එක් ව ‘JURE’ ව්යාපෘතිය යටතේ 2023 අගෝස්තු මස 26 වන දින කොල්ලුපිටිය රේනුකා හෝටලයේ දී අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් නිවාරණ වැඩසටහන් සඳහා පුහුණුකරුවන් ලෙස පුහුණු කිරීම සඳහා වූ එක් දින පුහුණු වැඩමුළුවක් පවත්වන ලදි. මෙම වැඩසටහන සදහා නිලධාරීන් 50 දෙනෙකු සහභාගි විය.

අල්ලස් හෝ දුෂණ චෝදනා විමර්ශන කොමිෂන් සභාව(CIABOC) සහ එක්සත් ජාතීන්ගේ සංවර්ධන වැඩසටහන (UNDP) මගින් 2023 ජූලි 22 ගාල්ල ආරාධනා හෝටලයේදී ගාල්ල ජනාධිපති බාලිකා විද්‍යාලය මුල් කොට ගනිමින් “අල්ලසින් තොර සුපිළිපන් පරපුරක් බිහි කරමු “ මැයෙන් “සුපිළිපන්න සමාජ පිහිටුවීමේ වැඩසටහනක” ප්‍රධාන සැසි 03ක් ඔස්සේ ශිෂ්‍ය ශිෂ්‍යාවන් 250ක් සදහා පවත්වන ලදී. එමෙන්ම මීට පෙර සුපිළිපන්න සමාජ පිහිටුවන ලද ගාල්ල විද්‍යාලෝක විද්‍යාලය හා ඕල්සෙන්ට්ස් විද්‍යාලයේ සිසුන් ඒ පිලිබඳ තම අත්දැකීම් බෙදා ගැනීම මෙහිදී සිදු කල අතර ඊට අමතරව ගාල්ල ඇලෝෂියස් විද්‍යාලය, තීරණගම බෝධිරාජ විද්‍යාලය, ගාල්ල අනුලාදේවි විද්‍යාලය හා ශ්‍රී හෘදය කන්‍යාරාමය යන විද්‍යාල නියෝජනය කරමින් සිසු සිසුවියන් පිරිසක් ද මීට සහභාගී විය. දිනය පුරාවටම සුපිළිපන්නභාවය වර්ධනය කිරීම සහ එහි ප්‍රායෝගික භාවිතය, ජාතික සුපිළිපන් සැලැස්ම, සුපිළිපන්න කමිටු පිහිටුවීම සිදු විය. එමෙන්ම එදින රාත්‍රියේ දී ගිනිමැලය වටා සංගීතමය රසාස්වාදනය ඔප් නැංවීම මගින් දරුවන්ගේ සුපිළිපන්භාවය වර්ධනය සහ අදාළ සංකල්ප කා වැද්දවීම යන අරමුණු මූලික කොට ගනිමින් වැඩසටහන දියත් විය. මෙහි දී නියෝජ්‍ය අධ්‍යක්ෂ ජනරාල් සුනේත්‍රා ජයසිංහ මහත්මියගේ මගපෙන්වීම යටතේ, සම්පත් දායකයින් ලෙස අල්ලස් හෝ දුෂණ විමර්ශන කොමිෂන් සභාවේ සහකාර අධ්‍යක්ෂ ජනරාල් දුෂ්මන්ති රාජපක්ෂ මහත්මිය, දූෂණ නිවාරණ නිලධාරී උදේශිකා ජයසේකර මහත්මිය, දූෂණ නිවාරණ නිලධාරී විමුක්ති ජයසූරිය මෙනවිය, දූෂණ නිවාරණ නිලධාරී රුෂාන්ති දිල්ෂානි මෙනවිය, දූෂණ නිවාරණ නිලධාරී ශමිමි ශ්‍රීලාල් මහතා සහභාගි වූ අතර තොරතුරු තාක්ෂණ සහය විමර්ශන නිලධාරී ප්‍රදීප් අමරජීව මහතා සහ තීක්ෂණ වික්‍රමසිංහ මහතා ලබා දෙන ලදී.

පදවිය ප්‍රාදේශිය ලේකම් කොට්ඨාසයේ ජනපද නිලධාරී 2023.08.25 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී, පදවිය, ශ්‍රී පුර ප්‍රදේශයේ පදිංචිකාරියක වන පැමිණිලිකාරියට හිමි පදවිය පාදේශිය ලේකම් කොට්ඨාශයේ ස්වර්ණභූමි ඔප්පුවක අයිතිය පැමිණිලිකාරියගේ ඥාතියකු වෙත පැවරීමට අවශ්‍ය කටයුතු කරදීම වෙනුවෙන් රුපියල් 25000/- ක (විසිපන්දහසක) මුදලක් අල්ලස් වශයෙන් ඉල්ලා ලබා ගන්නා අවස්ථාවේදී පදවිය - ශ්‍රී පුර ජනපද නිලධාරි කාර්යාලය තුලදී අත්අඩංගුවට ගන්නා ලදි.

අල්ලස් කොමිෂන් සභාවට ලද පැමිණිල්ලකට අනුව රු. 5000/- ක මුදලක් අල්ලස් ලෙස ඉල්ලා ලබා ගැනීමේ චෝදනාව මත, මතුගම ප්‍රාදේශීය ඉංජිනේරු කාර්යාලයේ සේවය කරනු ලබන කාර්මික නිලධාරියකු 2023.08.25 වන දින අල්ලස් හෝ දුෂණ චෝදනා විමර්ශන කොමිෂන් සභාවේ විමර්ශන නිලධාරින් විසින් අත්අඩංගුවට ගනු ලැබීය.

ලංකා ගමනාගමන මණ්ඩලයේ දියසෙන්පුර උප ඩිපෝවේ ස්ථානභාර නිලධාරි 2023.08.24 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගනු ලැබින. දියසෙන්පුර උප ඩිපෝවේ කොන්දොස්තරවරයකු වන පැමිණිලිකරුට විරුද්ධව ඔහු විසින් සමරි ටිකට් මගීන්ට නිකුත් කිරීම සම්බන්ධව ගොනු කර ඇති චෝදනා පත්‍රයට අදාලව පවත්වනු ලබන විනය පරීක්ෂණයේදී උසස් නිලධාරීන් මගින් පැමිණිලිකරුට වාසි වන සේ අඩු දඩුවමක් ලැබෙන ආකාරයට විනය පරීක්ෂණය සිදු කිරීමට උදව් කිරීම හා සැකකරුගේ සාක්ෂිය පැමිණිලිකරුට වාසි වන සේ ලබා දීම සදහා සැකකරු විසින් මුලින් රුපියල් 20,000.00ක් (විසිදහසක්) අල්ලස් වශයෙන් ඉල්ලා ලබාගෙන පසුව නැවත රුපියල් 60,000.00 (හැටදහසක) මුදලක් අල්ලස් වශයෙන් අයදින අවස්ථාවේදී හිගුරක්ගොඩ මැදිරිගිරිය මාර්ගයේ දිවුලන්කඩවල ප්‍රදේශයේදී අත්අඩංගුවට ගන්නා ලදි.

අල්ලස් හෝ දූෂණ චෝදනා විමර්ශන කොමිෂන් සභාව සහ එක්සත් ජාතීන් ගේ සංවර්ධන වැඩසටහන එක් ව ‘JURE’ ව්යාපෘතිය යටතේ 2023 ජූලි මස 21 වන දින සිට 23 වන දින දක්වා වාද්දුව බ්ලූ වෝටර්ස් හෝටලයේ දී සැසි ගණනාවකින් සමන්විත ධාරිතා සංවර්ධනය කිරීමේ තෙදින වැඩමුළුවක් පවත්වන ලදි.

“බස්නාහිර පලාතේ පුහුණුකරුවන් සඳහා වූ නේවාසික පුහුණු වැඩසටහන”

දූෂණය මැඩලීම උදෙසා අල්ලස් හෝ දූෂණ චෝදනා විමර්ශන කොමිෂන් සභාව තිර අදිටනින් දරන්නා වූ ප්‍රයත්නයන් වෙනුවෙන් එක්සත් ජාතීන් ගේ සංවර්ධන වැඩසටහන, යුරෝපා සංගමය, හා යුනිසෙෆ් ආයතනය යන පාර්ශවකරුවන් සමග JURE ව්යාපෘතිය (යුක්තිය ප්රතිසංවිධානය කිරීමේ වැඩසටහන) යටතේ අත්වැල් බැඳ ගත් අතර, එහි දී නිලධාරීන් 400 දෙනෙකු ඉලක්ක කර ගනිමින් වසරක් පුරා දිව යන වැඩසටහනක් අරඹන ලදි. “බස්නාහිර පලාතේ පුහුණුකරුවන් සඳහා වූ නේවාසික පුහුණු වැඩසටහන” මෙම ගමනේ වැදගත් ලක්ෂයක් සනිටුහන් කලේය.

අල්ලස් හෝ දූෂණ චෝදනා විමර්ශන කොමිෂන් සභාව වෙත ලද පැමිණිල්ලකට අනුව සිදු කරන ලද වැටලීම් රාජකාරියේදී, අල්ලස් වශයෙන් මුදල් ඉල්ලා ලබා ගැනීමේ චෝදනා මත තෙල්දෙනිය කොට්ඨාස අපරාධ විමර්ශන ඒකකයට අනුයුක්තව සේවය කල පොලිස් කොස්තාපල්වරයෙකු හා ඒ සදහා ආධාර අනුබල දුන් පොලිස් සැරයන්වරයෙකු 2023.08.22 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

සමූපකාර හා අභ්‍යන්තර වෙලඳ කටයුතු අමාත්‍යවරයෙකු ලෙස කටයුතු කළ ජොන්ස්ටන් ප්‍රනාන්දු, සමූපකාර තොග වෙලඳ සංස්ථාවේ සභාපති ලෙස කටයුතු කළ එරාජ් ට්‍රියන්ත ප්‍රනාන්දු සහ එම සංස්ථාවේ වැඩ බලන අධ්‍යක්ෂ ලෙස කටයුතු කළ මොහොමඩ් සාකීර් යන අයට විරුද්ධව අල්ලස් හෝ දූෂණ චෝදනා විමර්ෂණ කොමිශන් සභාව විසින් පැවරූ කොලඹ මහ අධිකරණයේ විභාගවුණු නඩුකරයේදී, විත්ති පාර්ෂවය විසින් ගනු ලැබූ මූලික විරෝධතාවය පිලිගනිමින් චූදිතයන් නිදහස් කිරීමට මහ අධිකරණ විනිසුරු තුමන් නියෝග දී තිබුණි.