පුද්ගලයෙකු විසින් ඉල්ලුම් කරන ලද වෙළඳ බල පත්‍රය ලබා දීමට අවශ්‍ය කටයුතු කරදීම සඳහා වෙනත් පුද්ගලයන් දෙදෙනෙකුට රු.2,000,000/-ක (රුපියල් ලක්ෂ විස්සක) මුදල් අල්ලසක් ලබාදෙන ලෙස ඉල්ලීම හා රු.1,500,000/- (රුපියල් ලක්ෂ පහළොවක) මුදල් අල්ලසක් ලෙස ඉල්ලා ලබාගැනීමට අනුබල දීමේ චෝදනා මත හිටපු වෙළඳ හා පරිසර රාජ්‍ය අමාත්‍යවරයෙකු වූ සදාසිවම් වියාලේන්ද්‍රන් 2025.03.25 දින ප.ව.1.20 ට අල්ලස් හෝ දූෂණ චෝදනා විමර්ශන කොමිෂන් සභාවේ දී අත්අඩංගුවට ගන්නා ලදී.

පනාමුර ප්‍රදේශයේ පදිංචි පාරම්පරික වෛද්‍යවරියක විසින් සිදු කරන ලද පැමිණිල්ලකට අනුව, පැමිණිලිකාරියට ආයුර්වේද වෛද්‍ය සභාව මගින් ලබාදෙන පාරම්පරික වෛද්‍යවරයෙකු බවට ලබාදෙන සහතිකය එම දෙපාර්තමේන්තුවේ කොමසාරිස්තුමාගේ අනුදැනුම ඇතිව ලබාදීමේ කටයුතු කරදෙන බව පවසා ඒ වෙනුවෙන් රුපියල් ලක්ෂ 10ක මුදලක් අල්ලස් වශයෙන් ඉල්ලා ඉන් රු.500,000/= (රුපියල් ලක්ෂ පහක) මුදලක් ඉල්ලා ලබාගැනීම සහ ඒ සඳහා ආධාර අනුබල ලබාදීම යන අල්ලස් චෝදනා මත කැළණිය ප්‍රදේශයේ පදිංචි පුද්ගලයෙකු, පිළිමතලාව ප්‍රදේශයේ පදිංචි ව්‍යාපාරිකයෙකු සහ නාවලපිටිය ප්‍රදේශයේ පදිංචි , රාජ්‍ය නොවන සංවිධානයක සම්බන්ධීකාරවරයෙකු 2025.03.22 දින පෙ.ව.11.55 ට පමණ සිනමන් ග්‍රෑන්ඩ් හෝටලය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

2023 අංක 9 දරන දූෂණ විරෝධි පනතේ 80 වන වගන්තිය මඟින් මගින් නිළධාරී/පුද්ගල කාණ්ඩ ගණනාවක් විසින් වත්කම් සහ බැරකම් ප්‍රකාශ කිරීමේ අවශ්‍යතාවය දක්වා ඇති අතර, ඒ සම්බන්ධ නව ප්‍රවනතාවයන් සහ වත්කම් බැරකම් ප්‍රකාශ කිරීමේ ආකෘතිය පිළිබඳ දැනුවත් කිරීමේ වැඩසටහනක් 2025 මාර්තු මස 20 වන දින පෙ.ව. 9.00ට අල්ලස් හෝ දූෂණ චෝදනා විමර්ශන කොමිෂන් සභාවේ ශ්‍රවනාගාරයේදී පවත්වන ලදි.

1994 අංක 19 දරන අල්ලස් හෝ දූෂණ චෝදනා විමර්ශන කොමිෂන් සභා පනතේ බලතල ක්‍රියාත්මක කිරීම සඳහා සිවිල් විමර්ශන නිලධාරීන් බඳවා ගැනීමට 2018.10.27 දින විවෘත තරඟ විභාගයක් සහ 2019.07.04 දින ව්‍යුහගත සම්මුඛ පරීක්ෂණයක් පවත්වන ලදී. එවකට රටේ පැවති කොවිඩ් - 19 වසංගත තත්ත්වය හේතුවෙන් සහ අමාත්‍ය මණ්ඩල තීරණ අනුව සිවිල් විමර්ශන නිලධාරී තනතුරු 200ක් යටපත් කිරීමට ගෙන තිබූ තීරණය නිසා, රාජ්‍ය සේවයේ බඳවා ගැනීම් ක්‍රියාවලිය සමාලෝචනය කිරීමේ කමිටු නිර්දේශ මත , එම බඳවා ගැනීම් අවලංගු කිරීමට සිදුවිය.

ජාතික ලොතරැයි මණ්ඩලයේ සාමාන්‍යාධිකාරී තනතුර සඳහා සුදුසුකම් නොලත් නිලධාරියෙකු පත්කිරීම මඟින් මුදල් අවභාවිතාවක් සිදුකර ඇති බවට කොමිෂන් සභාව වෙත යොමු වූ පැමිණිල්ලක් පිළිබඳව අල්ලස් හෝ දූෂණ චෝදනා විමර්ශන කොමිෂන් සභාවේ ලේකම්වරයා කටයුතු කළ ආකාරය ගැටළු සහගත බවට මාධ්‍ය වාර්තාවන් පළවී ඇත.

කුරුණෑගල, බෞද්ධාලෝක මාවත ප්‍රදේශයේ පදිංචි පුද්ගලයෙකු විසින් සිදු කරන ලද පැමිණිල්ලකට අනුව, පැමිණිලිකරුගේ නමට ලියාපදිංචි කරන ලද සින්නක්කර ඉඩමකට අදාළ ඔප්පුව සඳහා රජයට අයවිය යුතු හිඟ මුද්දර ගාස්තුව අඩුකර සකස්කර දීමට අවශ්‍ය කටයුතු සකසා දීම වෙනුවෙන් රු.50,000/-ක (රුපියල් පනස්දහසක) මුදලක් අල්ලස් ලෙස ඉල්ලා ලබාගැනීම යන අල්ලස් චෝදනා මත වයඹ පළාත් සභාවේ, පළාත් ආදායම් දෙපාර්තමේන්තුවේ සේවය කළ තක්සේරු නිලධාරිනියක 2025.03.17 දින ප.ව.1.05 ට පමණ පළාත් ආදායම් දෙපාර්තමේන්තු කාර්යාලයේ සැකකාරියගේ නිල මේසය අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

අඩිප්පල ප්‍රදේශයේ පදිංචි පුද්ගලයෙකු විසින් සිදු කරන ලද පැමිණිල්ලකට අනුව, පැමිණිලිකරුට විදේශගත වීමට අවශ්‍ය පොලිස් නිශ්කාශණ වාර්තාව ලබාදීම සඳහා සුදුසු බවට නිර්‌දේශ කරනු ලබන වාර්තාව ලබාදීම වෙනුවෙන් රු.2000/- (රුපියල් දෙදහසක) මුදලක් අල්ලස් වශයෙන් ඉල්ලා ඉන් රු.500/= ක් (රුපියල් රුපියල් පන්සියය) අඩුකර, රු.1,500/= ක (රුපියල් එක්දහස්පන්සියයක)මුදලක් අල්ලස් වශයෙන් ඉල්ලා ලබාගැනීම යන අල්ලස් චෝදනා මත ආරච්චිකට්ටුව පොලිස් ස්ථානයේ සේවය කළ පොලිස් කොස්තාපල්වරයෙකු 2025.03.14 දින ප.ව.3.55 ට පමණ බණ්ඩාරහේන කයිසර් බයිබල් දේවස්ථාන භූමිය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

රජයේ රැකිවා ලබාදෙන පවසා පැමිණිලිකරුගෙන් හා තවතු තිදෙනෙකුගෙන් රු.505,000/ක (රුපියල් පනස්දහස්පන්දහසක) මුදලක් අල්ලස් වශයෙන් ඉල්ලා, ලබාගැනීම සහ ඊට අනුබල දීම යන අල්ලස් චෝදනා මත සිවිල් පුරවැසියන් දෙදෙනෙකු විවෘත විමර්ශනයකින් පසුව 2025.03.13 දින පෙ.ව.7.30 ට පමණ කුට්ටිගල, පදලංගල යන ප්‍රදේශයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

අංගොඩ ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරුට විරුද්ධව හැටන් මහේස්ත්‍රාත් අධිකරණයේ විභාග වන නඩුවකින් පැමිණිලිකරු සහ ඔහුගේ බිරිඳ නිදහස් කර දී එම නඩුව අවසන් කර දීමට අවශ්‍ය කටයුතු සිදු කර දීම සඳහා රු.20,000/ක (රුපියල් විසිදහසක) මුදලක් ඉල්ලා අල්ලස් වශයෙන් ඉල්ලා එය රු.15,000/- ක් (රුපියල් පහළොස්දහසක්) දක්වා අඩු කර ඉල්ලා ලබාගත් හැටන් මූලස්ථාන පොලිස් ස්ථානයේ, පොලිස් සැරයන්වරයෙකු 2025.03.11 දින පෙ.ව.11.00 ට පමණ හැටන් මහේස්ත්‍රාත් අධිකරණයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

2025.03.04 දින කොළඹ දී.

ශ්‍රී ලංකා ජපන් තානාපති අකියෝ ඉසොමාටා මැතිතුමන් සහ පිරිස 2025 මාර්තු 04 වන දින අල්ලස් හෝ දූෂණ චෝදනා කොමිෂන් සභා සභාපති, විනිසුරු ගරු ඩබ්. එම්. එන්. පී ඉද්දවල මැතිතුමන් කොමිෂන් සභා කාර්යාලයේ දී හමු විය. එහි දී, පෙ.ව. 11.00 ට දෙපිරිස අතර සාකච්ඡා ආරම්භ වූ අතර, එය ශ්‍රී ලංකාවේ දූෂණ විරෝධී ප්‍රයත්න සඳහා ජපන් රජය විසින් දැනට ලබා දෙන සහයයන් හා ඉදිරියේ දී ලබා දෙන සහයයන් කේන්ද්‍ර කර ගනිමින් පැවැත්විනි.

නිකවැරටිය පොලිස් ස්ථානයේ සැරයන්වරයකු විසින් කරන ලද පැමිණිල්ලකට අනුව, පැමිණිලිකරු රාජකාරි කරනු ලබන නිකවැරටිය මූලස්ථාන පොලිස් ස්ථානයේ නොවිසඳුණු අපරාධ විමර්ශන අංශය මඟින් සිදු කරනු ලබන ගව සොරකම් කිරීමේ සිද්ධියකට අදාළව අවශ්‍ය කරනු ලබන සැකකරුවන් දෙදෙනෙකු එම අපරාධයේ සැකකරුවන් ලෙස නම් නොකර සාක්ෂිකරුවන් වශයෙන් නම් කරන ලෙසට ඉල්ලා ඒ වෙනුවෙන් රු. 20,000/- ක (රුපියල් විසිදහසක) මුදලක් අල්ලස් වශයෙන් පිරිනැමීම සහ එයට ආධාර අනුබල දීම යන චෝදනා මත දඹදෙණිය සහ අලව්ව ප්‍රදේශයේ පදිංචි සිවිල් පුද්ගලයින් දෙදෙනෙකු 2025.03.06 වන දින ‌ප.ව.4.00 ට පමණ නිකවැරටිය පොලිස් ස්ථානය ඉදිරිපිට ඇති ග්‍රොසරි වෙළඳසැලක් තුළ දී හා පොලිස් ස්ථානයේ ප්‍රධාන ගේට්ටුව අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.