මහවැලි අධිකාරියේ ඒකක කළමනාකරුවෙකු ලෙස සේවය කරමින් සිටියදී නිල කාර්යයක් ඉටු කර දීම පිණිස පුද්ගලයෙකුගෙන් අල්ලස් මුදලක් ලබා ගැනීම සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් අදාල චූදිතට එරෙහිව වර්ෂ 2013 දී පැවරූ කොළඹ මහාධිකරණයේ විභාග වූ නඩුකරයේ දී විත්ති පාර්ශවය විසින් ගෙන එන ලද මූලික විරෝධතාවයක් පිළිගනිමින් චූදිතව නිදහස් කිරීමට 2022/11/22 දින මහාධිකරණ විනිසුරුවරයා විසින් නියෝග කර තිබුණි. ගරු මහාධිකරණ විනිසුරුතුමන් ලබාදුන් එකී නියෝගයට එරෙහිව එම නියෝගය ප්‍රතිශෝධනය කිරීමට අල්ලස් හෝ දූෂණ චෝදනා විමර්ශන කොමිෂන් සභාව විසින් 2023 මැයි මස 29 වන දින ප්‍රතිශෝධන අයදුම්පතක් අභියාචනාධිකරණය වෙත යොමු කර තිබුණි.

ජාත්‍යන්තර මූල්‍ය අරමුදල ශ්‍රී ලංකාව සම්බන්ධයෙන් වන තෙවන ඇගයීමට සමගාමීව නිලධාරී මට්ටමේ සාකච්ඡා මේ වනවිට ආරම්භ කර ඇති අතර, ඒ සම්බන්ධයෙන් වන විශේෂ හමුවක් 2024 නොවැම්බර් මස 19 වන දින කොමිෂන් සභාවේ සභාපති, කොමසාරිස්වරුන් ඇතුළු නිලධාරීන්ගේ සහ ජාත්‍යන්තර මූල්‍ය අරමුදලේ නියෝජිතයන්ගේ සහභාගීත්වයෙන් අල්ලස් හෝ දූෂණ චෝදනා විමර්ශන කොමිෂන් සභා පරිශ්‍රයේ දී පැවැත්විණි.

තංගල්ල සුරාබදු කාර්යාලයට අනුයුක්තව කටයුතු කල නිලධාරියකුට එරෙහිව අල්ලස් හෝ දූෂණ චෝදනා විමර්ශන කොමිෂන් සභාව අධිකරණය හමුවේ අල්ලස් නඩුවක් පවරා තිබු අතර, එසේ නඩු පවරා ඇත්තේ අදාළ පැමිණිලිකාරියගෙන් ඇගේ සැමියාට එරෙහිව නීති මගින් කටයුතු නොකිරීමට රුපියල් 5000 ක මුදලක් තුටු පඬුරක් ලෙස බාරගැනීම සම්බන්ධවය. එය 2024.10.23 දින අභියාචනාධිකරණය විසින් ස්ථීර කිරීමට කටයුතු කර ඇත.

චූදිත ගම්පහ, වෑබඩ ප්‍රදේශයේ පදිංචි අයෙකු වන අතර, මොහු අධිකරණය මඟහැර පලාගොස් සිටි හෙයින් කොළඹ මහාධිකරණයේ චූදිත නොමැතිව නඩුව විභාගයට ගෙන තිබිය දී, වරෙන්තුව ක්‍රියාත්මක කිරීමට හැකිව අත්අඩංගුවට පත් විය.

රාගම, මත්තුමගල ප්‍රදේශයේ කාන්තාවක විසින් කරන ලද පැමිණිල්ලකට අනුව 2025 වර්ෂයේ දී පළමු ශ්‍රේණියට පැමිණිලිකාරියගේ දරුවා ඇතුලත්කර ගැනීම සඳහා රුපියල් 150,000/- ක මුදලක් අල්ලස් වශයෙන් ඉල්ලා ලබා ගත් රාගම ප්‍රදේශයේ ප්‍රාථමික විදුහලක විදුහල්පතිනියක් 2024.11.07 වන දින ප.ව. 4.00 ට පමණ අදාල පාසලේ කාර්යාලය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

රුපියල් මිලියන 150 ක මුදලක් අල්ලස් වශයෙන් ඉල්ලා, එය රුපියල් මිලියන 125ට අඩු කර එකී මුදල ලබාගැනීමේ චෝදනාවට වරදකරුවන් වූ ශ්‍රී ලංකා රේගුවේ හිටපු රේගු අධිකාරීන් තිදෙනෙකුට සහ සහකාර රේගු අධිකාරිවරයෙකුට එරෙහිව අල්ලස් කොමිසම විසින් පවරන ලද නඩුවේ දී කොළඹ මහාධිකරණය විසින් එකී චූදිතයන් වරදකරුවන් කරමින් වසර 35 බැගින් බරපතළ වැඩ සහිත සිර දඬුවම් නියම කෙරේ.

ගම්පොළ, ඉල්ලවතුර ප්‍රදේශයේ පදිංචිකරුවකු විසින් කරන ලද පැමිණිල්ලකට අනුව, පැමිණිලිකරු සම්බන්ධයෙන් අල්ලස් කොමිසම සිදු කරන පරීක්ෂණයකට අදාළව ප්‍රකාශයක් ලබා දීමට අල්ලස් කොමිසම වෙත 2024.10.25 වන දින යාම සඳහා රථයට ඉන්ධන ලබාගැනීමට හා මග වියදම් ලෙස රු.20,000/= ක මුදලක් අල්ලස් ලෙස ඉල්ලා ලබාගැනීමේ අල්ලස් චෝදනාව මත ස්ථානාධිපති පාලන, මූලස්ථාන පොලීසිය - ගම්පොළ කාර්යාලයේ ප්‍රධාන පොලිස් පරීක්ෂකවරයෙකු අල්ලස් චෝදනා මත 2024.10.23 වන දින ප.ව.5.25ට පමණ ගම්පොළ නගරය ආසන්නයේ නුවරඑළිය පාර පිහිටි ආපන ශාලාවක් තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

2024 ඔක්තෝම්බර් මස 05වන දින, කුරුණෑගල ‘මහගෙදර’ රජයේ සම්මන්ත්‍රණ ශාලාවේ දී උතුරු මැද හා වයඹ පළාත් කම්කරු නිලධාරීන් 52 දෙනෙකු සඳහා අල්ලස් හා දූෂණ නිවාරණ වැඩසටහනක් පවත්වන ලදී. මෙම වැඩසටහන සඳහා අල්ලස් හෝ දූෂණ චෝදනා විමර්ශන කොමිෂන් සභවේ දූෂණ නිවාරණ නිලධාරිනී J.L.A උදේශිකා මධුභාෂනි මහත්මිය, දූෂණ නිවාරණ නිලධාරිනී M.A. රුශාන්ති දිල්ශානි මහත්මිය හා කැලණිය විශ්වවිද්‍යාලයේ ජ්‍යෙෂ්ඨ කථිකාචාර්ය තරිඳු ධනංජය වීරසිංහ මහතා සම්පත් දායකත්වය ලබා දෙන ලදී. මෙම වැඩසටහන තුලින් ධනාත්මක චින්තනය, අල්ලස දූෂණය වැලැක්වීම හා එහි ප්‍රතිවිපාක සම්බන්ධයෙන් ද, ඒ පිළිබඳව ඔවුනට පවතින ගැටළු හා සුපිළිපන්නභාවය යන සංකල්පය පිළිබඳවත්, නව දූෂණ විරෝධී පනත පිළිබඳවත් දැනුවත් කිරීම සිදු කරන ලදී.

මඩකලපුව, චෙන්කල්අඩි ප්‍රදේශයේ පදිංචිකරුවකු විසින් කරන ලද පැමිණිල්ලකට අනුව, පැමිණිලිකරු මඩකලපුව සතුරුකොන්ඩාන් ප්‍රදේශයේ පර්චස් 65ක ඉඩමක් රුපියල් කෝටියකට මිල දී ගැනීමෙන් පසුව එහි මුද්දර ගාස්තු වශයෙන් රුපියල් ලක්ෂ 06ක් ගෙවූ පසු නැවත පළාත් ආදායම් කාර්යාලය මඟින් එහි තක්සේරු වටිනාකම රුපියල් කෝටි දෙකයි ලක්ෂ 65ක් වන බව දන්වා ඒ සඳහා දඩ මුදලත් සමඟ ගෙවිය යුතු රජයේ ගාස්තුව රුපියල් 850,000/- ක් බව පවසා එම මුදල රුපියල් ලක්ෂ 02 දක්වා අඩුකර දීමට අවශ්‍ය කටයුතු සලසා දීමට රුපියල් ලක්ෂ 02ක මුදලක් අල්ලස් වශයෙන් ඉල්ලා ලබා ගැනීමේ චෝදනාව මත නැගෙනහිර පළාත්, පළාත් ආදායම් දෙපාර්තමේන්තුවේ නියෝජ්‍ය කොමසාරිස්වරයෙකු 2024.10.15 වන දින ප.ව.12.45ට පමණ නැගෙනහිර පළාත් ආදායම් දෙපාර්තමේන්තුවේ මඩකලපුව කාර්යාලයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

ඔක්තෝබර් මස 01 වන දිනට යෙදෙන ලෝක ළමා දිනය නිමිත්තෙන් මෙවර අල්ලස් හෝ දූෂණ චෝදනා විමර්ශන කොමිෂන් සභාව විසින් 2024 ඔක්තෝබර් මස 01 වන දින සුහද විවාදයක් සංවිධානය කරනු ලැබීය. අල්ලස හා දූෂණය තුරන් කරමින් ශ්‍රී ලංකාව සුපිළිපන් දේශයක් බවට පත් කිරීමේ පරමාර්ථය පෙරදැරිව පවත්වනු ලැබූ මෙම සුහද විවාදය “අල්ලස සහ දූෂණය තුරන් කර සුපිළිපන්න ශ්‍රී ලංකාවක් ගොඩනැංවීම උදෙසා නීතිය ක්‍රියාත්මක කිරීම පමණක් ම ප්‍රමාණවත් නොවේ” සහ “අල්ලස සහ දූෂණය තුරන් කර සුපිළිපන්න ශ්‍රී ලංකාවක් ගොඩනැංවීම උදෙසා නීතිය ක්‍රියාත්මක කිරීම පමණක් ප්‍රමාණවත් වේ” යන මාතෘකාවන් ඔස්සේ නුගේගොඩ, අනුලා විද්‍යාලය සහ කොළඹ රාජකීය විද්‍යාලයේ සිසුන් අතර පැවැත්වුණි.

අල්ලස් හෝ දුෂණ චෝදනා විමර්ශන කොමිෂන් සභාවේ රහසිගත හා බුද්ධි විමර්ශන ඒකකය වෙත ලද තොරතුරක් මත ශ්‍රි ලංකා රේගුවේ නිෂ්කාශනය නොවු වාහන සම්බන්ධයෙන් සිදු කරන ලද විමර්ශනය මගින් භාරයට ගන්නා ලද මිට්ෂුබිසි ජිප් රථයක් අධිකරණ නියෝග පරිදි 2024.10.11 වන දින භාර දෙන ලද අතර එම වාහනය කොළඹ ප්‍රධාන මහේස්ත්‍රාත් වෙත ඉදිරිපත් කිරිමෙන් අනතුරව ඉදිරි රේගු විමර්ශන සදහා ශ්‍රි ලංකා රේගුව වෙත භාර ගන්නා ලෙසට කොළඹ ප්‍රධාන මහේස්ත්‍රාත් තිළිණ ගමගේ මැතිතුමන් විසින් නියෝග ලබාදෙන ලදි.

2023 අංක 9 දරන දූෂණ විරෝධී පනතේ 25 (2) වගන්තිය ප්‍රකාරව 2024.10.07 වන දින පුරප්පාඩු වී ඇති කොමිෂන් සභාවේ අධ්‍යක්ෂ ජනරාල් ධූරය සඳහා මාස 03ක කාලයක් ඇතුළත නව පත්කීරීමක් සිදු කරන ‌තෙක් ගරු ජනාධිපතිතුමන් විසින් දැනට කොමිෂන් සභාවේ අතිරේක අධ්‍යක්ෂ ජනරාල් ධුරයේ කටයුතු කරනු ලබන එම්.ආර්.වයි.කේ.උඩවෙල මහත්මිය වෙත කොමිෂන් සභාවට සහාය දැක්වීම පිණිස අධ්‍යක්ෂ ජනරාල්වරයාගේ බලතල, කාර්යය හෝ කර්තව්‍යය පවරා දී ඇත.