අම්බලන්තොට, බැරගම ප්‍රදේශයේ පුද්ගලයකු විසින් කරන ලද පැමිණිල්ලකට අනුව, අල්ලස් ඉල්ලීමේ හා ලබාගැනීමේ චෝදනාව මත සූරියවැව ප්‍රාදේශීය සභා ලේකම්වරයා 2023.06.07 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගනු ලැබින.

පැමිණිලිකරු විසින් ඔහුගේ සහෝදරයාගේ නමින් සූරියවැව පොළ භූමිය 2020/2021 වසර සඳහා බදු පදනම මත ලබා ගැනීමෙන් පසුව, Covid - 19 ගෝලීය වසංගත තත්වය හේතුවෙන් එම පොළ පවත්වාගෙන යාමට නොහැකි වූ කාලයට අදාලව තැන්පත් කරන ලද මුදලට සහනයක් ලබා දෙන ලෙස කරන ලද ඉල්ලීමට අනුව, සහනයක් සලසා දෙමින් තැන්පත් කරන ලද මුදලින් කොටසක් නැවත පැමිණිලිකරුට ලබාදීම සඳහා සූරියවැව ප්‍රාදේශිය සභාවේ ලේකම් විසින් අල්ලස් වශයෙන් මුලින් රුපියල් 100,000.00 (ලක්ෂයක)ක මුදලක් ඉල්ලා, එම මුදල රුපියල් 50,000.00 (පනස්දහසක්) දක්වා අඩුකර අල්ලස් වශයෙන් ඉල්ලා ලබාගන්නා අවස්ථාවේදී සූරියවැව ප්‍රාදේශීය සභාව තුලදි අත් අඩංගුවට ගන්නා ලදි.