කොමිෂන් සභාවට ලද පැමිණිල්ලක් මත සිදු කරනු ලබන විමර්ශනයකට අදාළව, යුධ හමුදාවේ සේවය කර විශ්‍රාම ලබා සිටින පැමිණිලිකරු ලබාගෙන ඇති විශ්‍රාම ණය මුදල පියවීමට උදව් කළ හැකි බව පවසා, පැමිණිලිකරුගේ ණය මුදල් සම්බන්ධයෙන් විස්තර ලබාගෙන එම විස්තර අනුව, රු.2,500,000/- (රුපියල් ලක්ෂ විසිපහක) ආධාර මුදල ලබා ගැනීමට පෙර ගෙවිය යුතු මුදල් ලෙස අවස්ථා 03 ක දී අල්ලස් ලෙස රු.129,600/- ක (රුපියල් එක්ලක්ෂ විසිනවදහස් හයසියය) ක මුදලක් මහජන බැංකු ගිණුමකට බැර කරවාගෙන, නැවතත් ලේඛණ ගාස්තු ලෙස රු.13,457/- ක මුදලක් අල්ලස් වශයෙන් ඉහත ගිණුමට බැර කරන ලෙස දැනුම් දීම යන අල්ලස් ඉල්ලා ලබාගැනීමේ චෝදනාව මත අනුරාධපුර පණ්ඩුලගම යුධ හමුදා කඳවුරේ සේවය කරන ලාන්ස් කෝප්‍රල්වරයෙකු වන දිසානායක මුදියන්සේලාගේ සජිත් සමීර දිසානායක යන අය 2026.04.30 දින පෙ.ව.10.30‌ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

අයිස් මත්ද්‍රව්‍ය ළඟ තබාගැනීමේ චෝදනාවකට අදාළව 2026.04.19 දින පෑලියගොඩ පොලීසියේ දූෂණ මර්දන අංශයේ නිලධාරීන් විසින් අත්අඩංගුවට ගන්නා ලද පුද්ගලයෙකුහට නීති මඟින් කටයුතු නොකර, නිදහස් කිරීමට අල්ලස් වශයෙන් රු.200,000/- ක (රුපියල් ලක්ෂ දෙක) ක මුදලක් ඉල්ලා ලබාගැනීම සම්බන්ධව 2026.04.24 දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් වැටලීමක් සිදු කරන ලදි. එහි දී එක් පොලිස් කොස්තාපල්වරයෙකු අත්අඩංගුවට ගත් අතර, තවත් පොලිස් කොස්තාපල්වරයෙකු අදාළ ස්ථානයෙන් පලා යන ලදි.

නීත්‍යානුකූල මුල් ලියාපදිංචියක් නොමැති රථයක් සඳහා අංක තහඩු නිකුත් කිරීමට අදාළව දූෂණය නැමැති වරද සිදු කිරීමේ චෝදනාව මත මෝටර් රථ ප්‍රවාහන දෙපාර්තමේන්තුවේ හිටපු නියෝජ්‍ය කොමසාරිස්වරියක ලෙස කටයුතු කළ වර්තමානයේ බත්තරමුල්ල, පරිවාස හා ළමා ආරක්ෂක සේවා දෙපාර්තමේන්තුවේ කොමසාරිස්වරියක ලෙස කටයුතු කරන රාජපක්ෂගේ ගයනි කෞෂල්‍යා විජේසිංහ යන අය 2026.04.28 දින පෙ.ව.9.20‌ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

කොමිෂන් සභාවට ලද පැමිණිල්ලකට අනුව සිදු කරනු ලබන විමර්ශනයකට අදාළව, නීති නිලධාරී වශයෙන් කටයුතු කරමින් මෙඩි හවුස් නැමැති ගොඩනැගිල්ල සෞඛ්‍ය අමාත්‍යංශය වෙත බදු පදනම ලබා ගැනීමෙන් පසුව, එයට අදාළ බදු ගිවිසුම් කාලය දීර්ඝ කිරීමට බදු ගිවිසුම් 03ක් සකස් කිරීම වෙනුවෙන් එකී ගිවිසුම් සකස් කිරීමේ ගාස්තු යැයි පවසා රු.4,134,887/- ක මුදලක් ඉල්ලා එයින් 2,000,000/- ක මුදලක් ලබාගෙන, ඉතිරි මුදල් ලබාදෙන ලෙස ඉල්ලීම් කර, එම ඉතිරි මුදලින් රුපියල් ලක්ෂ 05ක මුදලක් මෙඩි හවුස් පුද්ගලික සමාගම යන නමින් මහජන බැංකුවේ පවත්වාගෙන යනු ලබන ගිණුමකින් නිකුත් කරන ලද චෙක්පතක් මුදල් කර ලබාගනිමින් තුටු පඬුරු ඉල්ලීම හා භාර ගැනීම යන චෝදනාව මත සෞඛ්‍ය අමාත්‍යංශයේ හිටපු ප්‍රධාන නීති නිලධාරිනියක (විශ්‍රාමික) වූ අහමඩ් රියාසා අහමඩ් යන අය 2026.04.21 දින ප.ව 3.45 ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

වැල්ලවාය, වීරසේකරගම ප්‍රදේශයේ පදිංචි කුකුල් ගොවිපලක් පවත්වාගෙන යන ව්‍යාපාරිකයෙකුගෙන් රු.15,000/- ක මුදලක් අල්ලස් ලෙස ඉල්ලා, ලබාගැනීම සම්බන්ධව 2009 සැප්තැම්බර් මස 02 දින අල්ලස් හෝ දූෂණ චෝදනා විමර්ශන කොමිෂන් සභාවට ලද ලිඛිත පැමිණිල්ලකට අනුව, ඉදිරිපත් කරන ලද චෝදනා සම්බන්ධ‌යෙන් කොළඹ මහාධිකරණයේ විභාග කරන ලද නඩුවට අදාලව. වරදකරු වූ හපුතලේ දිස්ත්‍රික් කම්කරු කාර්යාලයේ, කම්කරු නිලධාරියෙකු වූ අමුදමන ආරච්චිගේ නිමල් රෝහණ සෝමවර්ධන යන අයට 2026.04.23 වන දින වසර 06ක සිර දඬුවම් නියම කරන ලදි. 

කොමිෂන් සභාවට ලද පැමිණිල්ලකට අනුව සිදු කරනු ලබන විමර්ශනයකට අදාළව, කළමණාකරණ සේවා දෙපාර්තමේන්තුවේ අනුමත, බඳවා ගැනීමේ පටිපාටියට පරිභාහිරව නිපුණතා සංවර්ධන හා වෘත්තීය පුහුණු අමාත්‍යවරයා ලෙස බලතල අයුතු ලෙස භාවිතා කරමින් කාර්මික අධ්‍යාපන හා පුහුණු කිරීමේ දෙපාර්තමේන්තුවට ගාල්ල දිස්ත්‍රික්කයෙන් පමණක් සුළු සේවකයන් 134 දෙනෙකු බඳවා ගැනීමෙන් දූෂණය නැමැති වරද සිදු කිරීම හා විනය නියෝග මත ස්ථාන මාරුවීම් කර තිබූ යාපනය තාක්ෂණ විද්‍යාලයේ අධ්‍යක්ෂවරයෙකුගේ ස්ථානමාරුවීම අවස්ථා කීපයක දී කාර්මික අධ්‍යාපන හා පුහුණු කිරීමේ දෙපාර්තමේන්තුවේ අධ්‍යක්ෂ ජනරාල්වරයාට බලපෑම් කර අවලංගු කරවීමට කටයුතු කිරීම තුළින් උක්ත අධ්‍යක්ෂවරයාට වාසියක් සිදුකිරීම යන චෝදනා මත නිපුණතා සංවර්ධන හා වෘත්තීය පුහුණු අමාත්‍යංශයේ හිටපු අමාත්‍යවරයෙකු වූ ඉහල මැදගම ගමගේ පියසේන යන අය 2026.04.20 දින පෙ.ව 10.30 ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

මුලතිව් ප්‍රදේශයේ ව්‍යාපාරිකයෙකු විසින් සිදු කරන ලද පැමිණිල්ලකට අනුව, පැමිණිලිකරු විසින් මුලතිව් දිස්ත්‍රික් මහ රෝහලේ ඇඳ ඇතිරිලි සෝදා පවිත්‍ර කිරීම සඳහා ලබා‌ගෙන ඇති ටෙන්ඩරයට අදාළව මාර්තු මසට අයවිය යුතු ගාස්තුව සඳහා ලබාදිය යුතු චෙක්පත නිදහස් කිරීම සඳහා රු.30,000/- (රුපියල් තිස්දහසක) මුදලක් ඉල්ලා, ලබාගැනීමේ අල්ලස් චෝදනා මත, මුලතිව් දිස්ත්‍රික් රෝහලේ සේවයයේ නියුතු ගණකාධිවරයෙකු වූ සන්මුගරාසා ප්‍රදීපන් සහ කළමණාකරණ සහකාරවරයෙකු වූ කාසිපිල්ලෙයි කාන්දීපන් යන අයවලුන් 2026.04.18 දින පිළිවෙළින් පෙ.ව 11.10 ට සහ පෙ.ව.11.05 ට මුලතිව් දිස්ත්‍රික් මහ රෝහලේ ගිණුම් අංශයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

කිලිනොච්චි ප්‍රදේශයේ පදිංචිකරුවෙකු විසින් සිදු කරන ලද පැමිණිල්ලකට අනුව, පැමිණිලිකරු විසින් මිල දී ගත් නව යතුරු පැදිය 2026.04.08 වන දින අංක තහඩු නොමැතිව ධාවනය කිරීමේ වරදට සහ ආදායම් බලපත්‍රයක් නොමැතිව ධාවනය කිරීමේ වරදට නීති මඟින් කටයුතු නොකර සිටීමට අල්ලස් වශයෙන් රු.10,000/- ක මුදලක් ඉල්ලා, එපමණ මුදලක් පැමිණිලිකරුට ලබා දීමට නොහැකි බවට දන්වා සිටි අවස්ථාවේ දී සැකකරු අරක්කු බෝතලයක් ඉල්ලා එය ලබා දෙන තෙක් පැමිණිලිකරුගේ ජාතික හැඳුනුම්පත වෙනුවට නිකුත් කර ඇති ලිපිය ඇපයට තබා ගෙන, අද දින (2026.04.09) පැමිණිලිකරු‌ගෙන් අල්ලස් වශයෙන් අරක්කු බෝතලයක් අල්ලස් ලෙස ඉල්ලා ලබාගැනීමේ චෝදනාව මත ධර්මපූරම් පොලිස් ස්ථානයේ , පොලිස් කොස්තාපල්වරයෙකු ලෙස සේවය කරන ප්‍රභාත් මධුෂන්ක දිසානායක යන අය 2026.04.09 දින ප.ව 3.03ට පමණ ධර්මපුරම් පොලිස් ස්ථානය අසල පිහිටි දුරකථන වෙළඳසැලක් අසල වසා ඇති ගොඩනැගිල්ල අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

ශ්‍රී ලංකා රූපවාහිනි සංස්ථාවේ අනුමත කාර්යය මණ්ඩලය ඉක්මවා සේවකයින් 06 දෙනෙකු බඳවා ‌ගෙන එම සේවකයින් එවකට ජනමාධ්‍ය අමාත්‍යවරයා වූ කෙහෙළිය රඹුක්වැල්ල යන අයගේ පුද්ගලික කාර්යය මණ්ඩලය සම්පූර්ණව තිබිය දී නීත්‍යනුකූල නොවන ලෙස අනුයුක්ත කර සංස්ථාව මඟින් එම සේවකයින්ට වැටුප් හා දීමනා ලෙස රු.14,325,422.83 ක මුදලක් ගෙවීමට කටයුතු සලස්වා දූෂණය නැමැති වරද සිදු කිරීම මත ශ්‍රී ලංකා රූපවාහිනි සංස්ථාවේ හිටපු සභාපතිවරයෙකු වූ උපාලි සරත් කෝන්ගහගේ සහ හිටපු අධ්‍යක්ෂ ජනරාල්වරයෙකු වූ සිරිල් දේවප්‍රිය අබේසිංහ යන අයවලුන් දූෂණ චෝදනා මත 2026.04.07 වන දින මධ්‍යහ්න 12.55 ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

නුවරඑළිය ප්‍රාදේශීය සභා බල ප්‍රදේශය තුළ සංවර්ධන කාර්යයන් සඳහා බලපත්‍රයක් ලබා ගැනීමේ දී ප්‍රාදේශීය සභාව විසින් අනුගමනය කළ යුතු ජාතික රාජ්‍ය සභාවේ 1978 අංක 41 දරණ නාගරික සංවර්ධන අධිකාරිය පනතේ 8 වගන්තිය සමඟ කියවිය යුතු පනතේ 21 වගන්තිය යටතේ සකස් කරන ලද නියමිත ක්‍රියාපටිපාටිය අනුගමනය නොකරමින් 2021 වර්ෂයේ දී අංක 476/එෆ්, මාගොඩ ග්‍රාම නිලධාරී වසමේ පිහිටි මූලික පිඹුරු අංක නු.2935 හි කැබලි අංක 18 දරණ රජයට අයත් ඉඩම සඳහා ඉදිකිරීම් සැලසුමක් අනුමත කර අදාළ අයදුම්කරු හට වාසියක් සලසා දීම තුළින් දූෂණය නමැති වරද සිදු කිරීම යන චෝදනාව මත නුවරඑළිය ප්‍රාදේශීය සභාවේ, සභාපතිවරයා 2026.04.07 දින පෙ.ව 09.10ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

2023 අංක 9 දරන දූෂණ විරෝධී පනත ක්‍රියාත්මක කිරීමේ ප්‍රමුඛ අවශ්‍යතාවයක් වන වත්කම් හා බැරකම් ප්‍රකාශ කිරීම සඳහා වන මධ්‍යගත ඉලෙක්ට්‍රොනික පද්ධතිය 2026 මාර්තු 31 දින ප්‍රකාශකයන් සඳහා විවෘත කිරීම 2026 මාර්තු මස 31 දින පෙරවරු 10.00ට බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා (BMICH) පරිශ්‍රයේ පිහිටි ජාත්‍යන්තර අධ්‍යයන මධ්‍යස්ථාන ශ්‍රවණාගාරයේ දී සිදු කරන ලදී.

නෝවුඩ් ප්‍රදේශයේ පදිංචිකාරියක විසින් සිදු කරන ලද පැමිණිල්ලකට අනුව, සැකකරු ඉඩම් කොමසාරිස් කාර්යාලයේ නිලධාරියෙකු ලෙස පෙනී සිටිමින් ඔප්පුවක් හෝ බලපත්‍රයක් නොමැතිව පැමිණිලිකාරිය පදිංචිව සිටින ඉඩමට ඔප්පුවක් සාදා දෙන බව පවසා, වරින්වර රු.275,000/- ක් ලබා ගෙන ඉඩම පිහිටි නෝවුඩ් වසම භාර ග්‍රාම නිලධාරීගේ වාර්තාව ලබා ගැනීමට ග්‍රාම නිලධාරියාට ලබා දීමට බවට පවසා රු.45,000/- (රුපියල් හතළිස්පන්දහස) ක මුදලින් අල්ලස් වශයෙන් ඉල්ලා, ලබාගැනීමේ චෝදනාව මත ගවරවිල,අප්කට් සාමිමලේ ප්‍රදේශයේ පදිංචි තැරැව්කරුවෙකු 2026.04.06 දින පෙ.ව 10.47ට පමණ අයිරදි හංදිය පාලම අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.