හුලංනුගේ ප්‍රදේශයේ පදිංචි පුද්ගලයෙකු විසින් සිදු කරන ලද පැමිණිල්ලකට අනුව, පැමිණිලිකරු වගාකටයුතු සිදු කරනු ලබන ඔහුගේ සහ බිරිඳගේ නමට වෙන් වෙන් වශයෙන් ඇති අක්කර 04ක ඉඩමෙන් නෙළුම්වැවයාය නම් රක්ෂිතයට වෙන් කර ඇති කොටසේ පැමිණිලිකරු විසින් වගා කටයුතු සිදු කිරීමේ වරද සම්බන්ධයෙන් නඩු නොපවරා සිටීම සඳහා රුපියල් 30,000/- (රුපියල් තිස්දහස) ක මුදලක් සහ ගල් වර්ගයේ අරක්කු බෝතලයක් අල්ලස් ලෙස ඉල්ලා ලබාගැනීමේ චෝදනාව මත හුලංනුගේ බීට්ටු වන නිලධාරී කාර්යාලයේ සේවයේ නියුතු බීට්ටු වන නිලධාරියෙකු 2026.01.12 වන දින ප.ව. 1.15 ට පමණ මත හුලංනුගේ බීට්ටු වන නිලධාරී කාර්යාලය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

රාගම ප්‍රදේශයේ පදිංචි පුද්ගලයෙකු විසින් සිදු කරන ලද පැමිණිල්ලකට අනුව, පැමිණිලිකරු විසින් අනුමත කර ගැනීම සඳහා ඉදිරිපත් කරන ලද ගොඩනැගිලි සැලැස්මේ අඩුපාඩු පෙන්වා එම අඩුපාඩු නොසලකා සැලැස්ම අනුමත කර දීමට අවශ්‍ය කටයුතු සිදු කර දීම සඳහා අල්ලස් ලෙස රුපියල් 50,000/- (රුපියල් පනස්දහස) ක මුදලක් ඉල්ලා ලබාගැනීමේ චෝදනාව මත වත්තල ප්‍රාදේශීය සභාවේ වැලිසර උප කාර්යාලයේ තාක්ෂණික නිලධාරියෙකු 2026.01.07 වන දින ප.ව. 3.50 ට පමණ වත්තල ප්‍රාදේශීය සභාවේ වැලිසර උප කාර්යාලයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

කොමිෂන් සභාව විසින් සිදු කරනු ලබන විමර්ශනයකට අදාළව නුවරඑළිය සහකාර පොලිස් අධිකාරී කාර්යාලයේ සහකාර පොලිස් අධිකාරිවරයෙකු සහ කල්මුණේ සහකාර පොලිස් අධිකාරී කාර්යාලයේ කාන්තා පොලිස් සැරයන්වරයෙකු අත්අඩංගුවට ගන්නා ලදි.

කින්නියා ප්‍රදේශයේ පුද්ගලයෙකු විසින් සිදුකරන ලද පැමිණිල්ලකට අනුව, පැමිණිලිකරුට පහරදීමක් සම්බන්ධයෙන් කරන ලද පැමිණිල්ලකට අදාලව සැකකරුවන් දෙදෙනෙකු අත්අඩංගුවට ගෙන ඉතිරි සැකකරුවන් අත්අඩංගුවට ගෙන නීතිමය කටයුතු කිරීම සඳහා අල්ලස් වශයෙන් රු. 10,000/- ක මුදලක් ඉල්ලා එම මුදල වෙනත් අයෙකු මාර්ගයෙන් ලබාගැනීමට කටයුතු කිරීම සම්බන්ධව කින්නියා පොලිස් ස්ථානයේ උප පොලිස් පරීක්ෂකවරයෙකු කින්නියා පොලිස් ස්ථානයේ විවිධ පැමිණිලි අංශය තුලදී 2025.12.31 වන දින ප.ව. 5.20 ට පමණ අල්ලස් හෝ දුෂණ විමර්ෂණ කොමිෂන් සභාවේ විමර්ෂණ නිලධාරීන් විසින් අත්අඩංගුවට ගන්නා ලදී.

Download PDF

ජා-ඇල දඩුගම ප්‍රදේශයේ ව්‍යාපාරිකයකු විසින් කරන ලද පැමිණිල්ලකට අනුව වෙනත් පුද්ගලයකු විසින් සොරකම් කර ඇති රන් භාණ්ඩ පැමිණිලිකරු මිලදී ගෙන ඇති බවට පවසා, එම සොර බඩු සම්බන්ධයෙන් නීති මගින් කටයුතු නොකර සිටීමට හා අධිකරණය වෙත ඉදිරිපත් නොකර සිටීමට රු. 300,000/-ක මුදලක් හා රන් පවුම් ¾ ක ප්‍රමාණයක් අල්ලස් වශයෙන් ඉල්ලා ඉන් රු. 250,000/- ක මුදලක් අල්ලස් වශයෙන් ලබා ගැනීම සම්බන්ධව ගම්පහ මූලස්ථාන පොලිස් ස්ථානයේ, අපරාධ විමර්ශන අංශයේ ස්ථානාධිපතිවරයා 2025.12.25 වන දින ප.ව. 03.10ට පමණ ගම්පහ තක්ෂිලා මහා විද්‍යාලය ඉදිරිපිට මාර්ගයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

අත්තනකඩවල ප්‍රදේශයේ පුද්ගලයෙකු විසින් සිදු කරන ලද පැමිණිල්ලකට අනුව, පැමිණිලිකරු විසින් ඔහුට අයත් යතුරු පැදියෙන් 2025.12.09 වන දින ගමන් කරමින් සිටිය දී ඔහුගේ යතුරු පැදිය නවතා පරීක්ෂා කර, වලංගු රියැදුරු බලපත්‍රයක් හා ආදායම් බලපත්‍රයක් නොමැතිව, බීමත්ව ධාවනය කිරීම සම්බන්ධයෙන් නීති මගින් කටයුතු නොකර, පැමිණිලිකරුගේ යතුරු පැදියේ රක්ෂණ සහතිකය සහ කල් ඉවත් වූ ආදායම් බලපත්‍රය සැකකාර පොලිස් නිලධාරීන් භාරයට ගෙන, එම බලපත්‍ර දෙක ආපසු ලබාදීම සඳහා රු. 5,000/- ක (රුපියල් පන්දහසක) මුදලක් අල්ලස් ලෙස ඉල්ලූ, දියබෙදුම පොලිස් ස්ථානයේ රථ වාහන අංශයේ සේවය කරනු ලබන පොලිස් කොස්තාපල්වරයෙකු සහ පොලිස් සැරයන්යරයෙකු 2025.12.11 වන දින පෙ.ව.11.30 ට පමණ දියබෙදුම සති පොල ඉදිරිපිට ප්‍රධාන මාර්ගයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

දේශීය ඖෂධ නිෂ්පාදනාගාරයක් පරීක්ෂා කර නීති විරෝධිව යන්ත්‍ර මඟින් ගංජා අඹරන බවට චෝදනා කර, ඒ සම්බන්ධව නීති මඟින් කටයුතු නොකර සිටීමට රු.2,000,000/- (රුපියල් ලක්ෂ විස්ස ) ක මුදලක් අල්ලස් ලෙස ඉල්ලා සිටීමේ අල්ලස් චෝදනා මත සුරාබදු දෙපාර්තමේන්තුවේ මත්ද්‍රව්‍ය නාශක කාර්යාංශයේ සුරාබදු සැරයන්වරයෙකු 2025.12.10 දින පෙ.ව.9.00 ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

ශ්‍රී ලංකා මහවැලි අධිකාරියට අයත් ඉඩමක ඉදිකර ඇති ගොඩනැගිල්ල ඇතුළු දේපල 2022.05.09 වන දින ඇති වූ ජනතා අරගලයේ දී හානියට පත් වූ පසු වන්දි ලබාගැනීමට උපයෝගී කර ගැනීම සඳහා එම දේපල හිටපු මොනරාගල දිස්ත්‍රික් පාර්ලිමේන්තු මන්ත්‍රි සහ වාරිමාර්ග රාජ්‍ය අමාත්‍ය ශෂින්ද්‍ර කුමාර රාජපක්ෂ යන අයගේ සේවකයකු වන මනෝජ් හේමලාල් ඒකනායක නමින් බලපත්‍රයක් සකස් කිරීම සඳහා තමා යටතේ සේවය කරනු ලබන ශ්‍රී ලංකා මහවැලි අධිකාරියේ වලව කලාපයේ නේවාසික කළමණාකරු ඇතුළු එහි නිලධාරීන්ට බලපෑම් සිදුකර, උක්ත ශෂින්ද්‍ර කුමාර රාජපක්ෂ යන අයට ඉහත වන්දි මුදල් ලබාගැනීම සඳහා ආධාර අනුබල කිරීමෙන් 1992 අංක 12 දරණ පොදු දේපල පනතේ 5 (1) වගන්තිය අනුව වරදක් කිරීමට අනුබල දී 2023 අංක 9 දරණ දූෂණ විරෝධී පනතේ 133 සහ 135 වගන්තිය සමඟ කියවෙන එම පනතේ 111 වගන්තියේ සඳහන් දූෂණය නැමැති වරද සිදු කිරීම මත ශ්‍රී ලංකා මහවැලි අධිකාරියේ එවකට අධ්‍යක්ෂ ජනරාල් කීර්ති බණ්ඩාර කොටගම යන අය 12.09 වන දින ප.ව.4.30ට පමණ අල්ලස් හෝ දුෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

නිලාවේලි ප්‍රදේශයේ පදිංචිකාරියක විසින් සිදු කරන ලද පැමිණිල්ලකට අනුව, පැමිණිලිකාරියගේ විදේශගත වීමට අදාළව ලේඛණ සකස් කර ගැනීම සඳහා අවශ්‍ය වන පොලිස් වාර්තාව ලබා දීමට අවශ්‍ය කටයුතු කර දීම සඳහා රු.10,000/- (රුපියල් දසදහසක) ක මුදලක් අල්ලස් ලෙස ඉල්ලා, ලබාගැනීමේ චෝදනාව මත නිලාවේලි පොලිස් ස්ථානයේ සේවය කරනු ලබන පොලිස් සැරයන්වරයෙකු 2025.12.16 වන දින ප.ව.4.56 ට පමණ පැමිණිලිකාරියගේ නිවසේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

ඒත්තාල ප්‍රදේශයේ පුද්ගලයෙකු විසින් සිදු කරන ලද පැමිණිල්ලකට අනුව, පැමිණිලිකරුට අයත් යතුරු පැදියේ සංඥා පහන් අක්‍රීය තත්ත්වයේ පැවතීම සම්බන්ධයෙන් 2025.11.19 වන දින ලබාගෙන තිබූ රථවාහන නඩුවට අදාළ නීති මඟින් ඉදිරි කටයුතු නොකර පොලිසිය භාරයට ‌ගෙන තිබූ පැමිණිලිකරුට අයත් රියදුරු බලපත්‍රය ආපසු පැමිණිලිකරුට ලබාදීමට මුල් අවස්ථාවේ දී රු.2,200/- ඉල්ලා, අද දින (2025.12.17) තවත් රු.1,000/- ක මුදලක් වැඩිකර, රු.3,200/- (රුපියල් තුන්දහස් දෙසීයක) මුදලක් අල්ලස් ලෙස ඉල්ලා, ලබාගැනීමේ චෝදනාව මත හලාවත මූලස්ථාන පොලිස් ස්ථානයේ සේවය කරනු ලබන පොලිස් සැරයන්වරයෙකු (වැඩබලන ස්ථානාධිපති රථවාහන) 2025.12.17 වන දින ප.ව.4.10 ට පමණ හලාවත මූලස්ථාන පොලිස් ස්ථානයේ ප්‍රධාන දොරටුව අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

අල්ලස් හෝ දූෂණ චෝදනා විමර්ශන කොමිෂන් සභාව විසින් සිදු කරගෙන යනු ලබන විමර්ශනයකට අදාළව, එවකට ලංකා ඛනිජ තෙල් නීතිගත සංස්ථාවේ සභාපති වශයෙන්, 2017 – 2018 වර්ෂ සඳහා ලංකා ඛනිජ තෙල් නීතිගත සංස්ථාව වෙත ඉන්ධන මිල දී ගැනීමට නියමිතව තිබූ දිගුකාලීන ටෙන්ඩර් 03ක් අවලංගුකොට, ඒ වෙනුවට වැඩි මිල ගණන් යටතේ ස්ථානීය ටෙන්ඩර් ක්‍රියාත්මක කිරීමට සිදු වීම තුළින් ඛනිජතෙල් නීතිගත සංස්ථාව වෙත රුපියල් මිලියන 800කට ආසන්න පාඩුවක් සිදු කිරීමේ දූෂණ චෝදනා මත ලංකා ඛනිජතෙල් නීතිගත සංස්ථාවේ හිටපු සභාපති ධම්මික රණතුංග යන අය අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2025.12.15 වන දින පෙ.ව.11.15 ට පමණ අත්අඩංගුවට ගන්නා ලදී.