ශ්‍රී ලංකාව තුළින් අල්ලස හා දූෂණ වැළැක්වීම සඳහා වන “දුෂණ විරෝධී ජාතික ක්‍රියාකාරී සැලැස්ම, 2025-2029” සකස් කිරීම සදහා අදහස් හා යෝජනා ලබා ගැනීමේ වැඩසටහන් මාලාවේ තරුණ ප්‍රජාව මූලික කර ගනිමින් පැවැත්වූ වැඩසටහන 2024 අගෝස්තු 23වැනිදා රාමඩියා රන්මාල් නිවාඩු නිකේතන පරිශ්‍ර‍ෙය් දී පෙ.ව 9.00 - ප.ව 4.00 දක්වා එක්සත් ජාතීන්ගේ සංවර්ධන වැඩසටහනේ සහයෝගීත්වයෙන් පවත්වන ලදී. සමාජ ක්‍රියාකාරී තරුණයින්, විශ්ව විද්‍යාල ප්‍රජාව මගින් අදහස හා යෝජනා ලබා ගැනීම මින් සිදු කළ අතර තරුණ තරුණයින් 50 දෙනෙකුට ආසන්න පිරිසක් සහභාගී විය. අල්ලස් හෝ දූෂණ චෝදනා විමර්ශන කොමිෂන් සභාවේ තෙවන කොමසාරිස් ජනාධිපති නීතිඥ චේතිය ගුණසේකර මහතාගේ සහ නියෝජ්‍ය අධ්‍යක්ෂ ජනරාල් රුවිනි වික්‍රමසිංහ මහත්මියගේ ප්‍රධානත්වයෙන් වැඩසටහන ආරම්භ කල අතර අල්ලස් හෝ දූෂණ චෝදනා විමර්ශන කොමිෂන් සභාවේ සහකාර අධ්‍යක්ෂ ජනරාල් තනූජා බණ්ඩාර මෙනවියය , අල්ලස් හෝ දූෂණ චෝදනා විමර්ශන කොමිෂන් සභාවේ දූෂණ නිවාරණ නිලධාරි විමුක්ති ජයසූරිය මහත්මිය සහ දූෂණ නිවාරණ නිලධාරි එරංගා මධූෂි මෙනවිය විසින් මෙම වැඩසටහන මෙහෙයවන ලදී.

මාදිවෙල ප්‍රදේශයේ පිහිටි නිවසක්, සංවර්ධන ලොතරැයි මණ්ඩලයට කුලියට ගැනීම වෙනුවෙන් එකී නිවස සඳහා බදු අත්තිකාරම් මුදල් ලෙස රු.1,980,000/- (රුපියල් දහනව ලක්ෂ අසූ දහස) ක් හෝ ඊට ආසන්න මුදලක් එකී නිවෙස් හිමිකරුට නීති විරෝධී ලෙස මුදා හැරීමට ඉහත නම සඳහන් චූදිත, ස්වකීය ධුරය සෘජුව හෝ අන්‍යාකාරයෙන් හෝ භාවිතා කරමින් සංවර්ධන ලොතරැයි මණ්ඩලයේ නිලධාරීන්ව පෙළඹවීමෙන් 2018 අංක 22 හා 1994 අංක 20 දරන පනතින් සංශෝධිත 1954 අංක 11 දරන අල්ලස් පනතේ 70 වගන්තිය යටතේ දූෂණය නැමැති වරද සිදුකිරීම සම්බන්ධයෙන් සංවර්ධන ලොතරැයි මණ්ඩලයට හිටපු සභාපතිවරයෙකු වූ සරණ ගුණවර්ධන යන අයට එරෙහිව වර්ෂ 2022 දී අල්ලස් කොමිෂන් සභාව විසින් නඩු පවරන ලදී.

ඇතිමලේ ප්‍රදේශයේ තමා සිදුකළ වරදට නීතිය මගින් කටයුතු නොකර සිටීමට අල්ලස් වශයෙන් රුපියල් 5000 ක මුදලක් පිරිනැමීමට ගිය බඩල්කුඹුර දොඩන්ගහදුරල ප්‍රදීප් උපුල් කුමාර යන තැනැත්තෙකුට රජයේ සේවකයෙකුට අල්ලස් පිරිනැමීමේ චෝදනාව යටතේ කොළඹ මහාධිකරණය විසින් 2024.08. 26 දින වසර 2 ක බරපතල වැඩ සහිත සිර දඬුවම් වසර 15 ක් අත් හිටුවීමට නියෝග දී ඇත.

හිටපු ආපදා කළමනාකරණ අමාත්‍යවරයෙකු වූ ඒ .එච් . එම් .ෆවුසි මහතාට වසර 2 ක් දක්වා වූ සිර දඬුවම් වසර 10 කට අත් හිටුවීමට කොළඹ මහාධිකරණය විසින් 2024.08.27 වන දින නියෝග දී ඇත. එසේ නියෝග දී ඇත්තේ 2010 වසරේදී ආපදා කළමනාකරණ මධ්‍යස්ථානය වෙත ලබා දී තිබුණු රු. 19,500,000.ක් වටිනා ටොයෝටා ලෑන්ඩ් කෘෂර් වර්ගයේ ජීප් රථයක් තම පුද්ගලික භාවිතයට ගැනීමත් එහි නඩත්තු කටයුතු වෙනුවෙන් ජ්‍යෙෂ්ඨ අමාත්‍ය ලේකම් කාර්යාලය මගින් රු. 1,073,334.93 ක මුදලක් ලබාගැනීම සම්බන්ධවය.

අල්ලස් හෝ දූෂණ චෝදනා විමර්ශන කොමිෂන් සහාවේ රහසිගත හා බුද්ධි විමර්ශන ඒකකය වෙත ලද තොරතුරක් අනුව ශ්‍රී ලංකා රේගුවේ නිශ්කාෂණය නොවූ වාහන සම්බන්ධයෙන් විමර්ශනයක් සිදුකර ඇත. එම විමර්ශනය මගින් භාරයට ගනු ලැබූ වාහන තුනක් කොළඹ ප්‍රධාන මහේස්ත්‍රාත්වරයා වෙත ඉදිරිපත් කරනු ලැබූ අතර ඉදිරි රේගු විමර්ශන සඳහා ශ්‍රී ලංකා රේගුව වෙත භාර ගන්නා ලෙසට 2024.08. 23 වෙනි දින ගරු මහේස්ත්‍රාත් තිලිණ ගමගේ මහතා නියෝග දී තිබේ.

විදේශගත වීමකට අදාළව පදිංචි සහතිකයක් නිකුත් කරවා ගැනීම සඳහා රු.15,000/-ක මුදලක් අල්ලස් වශයෙන් අයැද, වැටලීමේ දී රු.10000/-ක අල්ලස් මුදලක් භාරගැනීම සම්බන්ධව අල්ලස් හෝ දූෂණ චෝදනා විමර්ශන කොමිෂන් සභාව විසින් රත්නපුර, පැලැල්ලේගම ප්‍රදේශයේ ග්‍රාම නිලධාරියෙකු අත්අඩංගුවට ගනු ලැබූ අතර, ඔහුට එරෙහිව අධිචෝදනා ගරු මහාධිකරණයේ ගොනු කරන ලදි.

මතුගම, යටදොලවත්ත ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරුට අයත් යතුරු පැදිය අධිකරණය වෙත ඉදිරිපත් නොකර නැවත පැමිණිලිකරුහට ලබාදීම වෙනුවෙන් රු.20,000/- (රුපියල් විසිදහස) ක අල්ලස් මුදලක් තුටු පඬුරක් වශයෙන් පළවෙනි සැකකරුගේ දැනුම්දීම මත දෙවෙනි සැකකරු මාර්ගයෙන් ඉල්ලා ලබා ගැනීමේ චෝදනාව මත පොලිස් සැරයන්වරයෙකු සහ ආදාහනාගාර කම්කරුවෙකු 2024.08.29 වන දින ප.ව 7.55ට සහ ප.ව.7.35 ට පමණ පළමු සැකකරු මතුගම මහේස්ත්‍රාත් අධිකරණයේ ආරක්ෂක මුර කුටියේ දී සහ දෙවෙනි සැකකරු මතුගම පොලිස්ථානය අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

2012 වසර වන විට ග්‍රීසිය දැඩි ආර්ථික අර්බුදයකට ලක්වී තිබියදී, ඒ බව දැනදැනම ග්‍රීක රජය විසින් නිකුත් කරන ලද භාණ්ඩාගාර බිල්පත් මිලදී ගැනීමෙන් රජයට රු. 1,843,267,595/- ක පාඩුවක් සිදුකරමින් දූෂණයක් සිදුකිරීම සම්බන්ධයෙන් සිදු කරන ලද පැමිණිල්ලකට අදාළ විමර්ශන කටයුතු අල්ලස් හෝ දූෂණ චෝදනා විමර්ශන කොමිෂන් සභාව විසින් සිදු කරන ලදී.

ජනාධිපති ධුර අපේක්ෂකයින් විසින් දූෂණ විරෝධී පනතේ 89 වගන්තිය ප්‍රකාරව තම නාමයෝජනා පත්‍ර සමඟ ඔවුන්ගේ වත්කම් හා බැරකම් ප්‍රකාශ ද මැතිවරණ කොමිෂන් සභාව වෙත භාර දීමෙන් අනතුරුව, අදාළ ප්‍රකාශ අල්ලස් හෝ දූෂණ චෝදනා විමර්ශන කොමිෂන් සභාව වෙත භාර ගැනීමට කටයුතු කරනු ලැබ ඇත.

පින්නවල ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව පැමිණිලිකරුට අයත් බස් රථයට බලංගොඩ මාර්ගයේ ධාවනය කිරීමට ලබා දී ඇති එක් වේලාවක් සංශෝධනය කර දීමට අවශ්‍ය නිර්දේශය ලබා දීම වෙනුවෙන් රු. 60,000/- ක අල්ලස් මුදලක් තුටුපඬුරක් වශයෙන් ඉල්ලා ලබා ගැනීමේ චෝදනාව මත සබරගමුව මාර්ගස්ථ මගී ප්‍රවාහන අධිකාරියේ නිලධාරියෙකු 2024.08.22 වන දින පෙ. ව. 10.10 ට පමණ බලංගොඩ බස් නැවතුම්පොල කාර්යාලය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

ශ්‍රී ලංකාව තුළින් අල්ලස හා දූෂණය වැළැක්වීම සඳහා වන “දුෂණ විරෝධී ජාතික ක්‍රියාකාරී සැලැස්ම, 2025-2029” සඳහා අදහස් හා යෝජනා ලබා ගැනීම මේ වන විටත් ආරම්භ කර ඇති අතර, එහි තවත් සුවිශේෂි අදියරක් වන ජාතික මට්ටමේ අදහස් හා යෝජනා ලබාගැනීමේ වැඩමුළුමාලාව ද මේ වන විට ආරම්භ කර ඇත.

ශ්‍රී ලංකාව තුළින් අල්ලස හා දූෂණය වැළැක්වීම සඳහා වන “දුෂණ විරෝධී ජාතික ක්‍රියාකාරී සැලැස්ම, 2025-2029” සඳහා අදහස් හා යෝජනා ලබා ගැනීම මේ වන විටත් ආරම්භ කර ඇත.