සී/ස ශ්‍රී ලංකා රජයේ වාණිජ (විවිධ) නීතිගත සංස්ථාව වෙත භාණ්ඩ හා සේවා මිළදී ගැනීමේදී අනුගමනය කළ යුතු නියමිත ක්‍රියාපටිපාටිය අනුගමනය නොකරමින් 2015 වර්ෂයේදී සංස්ථාව වෙත කිසිදු අවශ්‍යතාවයක් නොමැතිව කොකුන් ගබඩා (තාවකාලික ගබඩා) 50 ක් ආනයනය කිරීම මගින් සංස්ථාවට එනම් රජයට රු. 99,679,799.70 ක පාඩුවක් හා එම මුදලේ වටිනාකමට සමාන වාසියක් බාහිර පාර්ශව වෙත සලසාදීම යන චෝදනාවට සී/ස ශ්‍රී ලංකා රජයේ වාණිජ (විවිධ) නීතිගත සංස්ථාවේ හිටපු සභාපති හුසෙයින් අහමඩ් බහිලා 2025.10.31 වන දින පෙ.ව. 8.30 ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ දී අත්අඩංගුවට ගන්න ලදී.

අල්ලස් හෝ දූෂණ චෝදනා විමර්ශන කොමිෂන් සභාවට ලද තොරතුරු මත, සිදු කරන ලද වැටලීමකට අනුව, නඩු වාර්තාවක සහතික පිටපතක් ලබාදීම සඳහා අල්ලස් වශයෙන් රු.10,000/- (රුපියල් දස දහසක) මුදලක් අල්ලස් වශයෙන් ඉල්ලා ලබාගත් කොළඹ 12, දිසා අධිකරණයේ කාර්යාල කාර්ය සහායකවරයෙකු අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2025.10.29 වන දින පෙ.ව.10.26ට පමණ කෙසෙල්වත්ත පොලිස් ස්ථානය ආසන්නයේ ඇති වෙළඳසැලක් ඉදිරිපිට දී අත්අඩංගුවට ගන්නා ලදී.

රජයේ රැකියාවක් ලබාදීම උදෙසා එනම්, වරාය අධිකාරියේ කම්කරු රැකිවක් ලබා දීමට අල්ලස් ලෙස රුපියල් ලක්ෂ 05ක මුදලක් අවශ්‍ය බවත් ඒ සඳහා පළමුව රුපියල් ලක්ෂ 2.5ක් ලබා දෙන ලෙසටත් ඉතිරි මුදල් රැකියාව ලැබුණු පසු ලබා දෙන ලෙසත් පවසා අල්ලස් ලෙස රු.245,000ක (රුපියල් දෙලක්ෂ හතළිස් පන්දහසක) මුදලක් ඉල්ලා ලබාගැනීමේ චෝදනාව මත සිදු කෙරෙන විමර්ශනයකට අදාළව, ධීවර දෙපාර්තමේන්තුවේ හිටපු නිලධාරියෙකු වන රුප්පේ ගෙදර මදුෂ දිලිපන ජයසූරිය සහ නිවාස ඉදි කිරීම් අමාත්‍යංශයේ හිටපු නියෝජ්‍ය අමාත්‍ය ඉන්දික බණ්ඩාරනායක මහතාගේ කාර්යය මණ්ඩලයේ නිලධාරියෙකු වූ ඉන්දික බණ්ඩාර විජේසුන්දර යන අයවලුන් 2025.10.23 වන දින ප.ව.2.00ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිළධාරීන් විසින් අත්අඩංගුවට ගන්නා ලදී.

අල්ලස් හෝ දූෂණ චෝදනා විමර්ශන කොමිෂන් සභාව වෙත ලැබුණු රහසිගත තොරතුරකට අනුව, කොමිෂන් සභාවේ නිල හැඳුනුම්පතට සමාන ව්‍යාජ හැඳුනුම්පතක් සකස් කරමින් අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරියෙකු ලෙස පෙනී සිට, රජයේ නිලධාරීන් වෙත එම හැඳුනුම්පත ඉදිරිපත් කරමින් රජයේ නිලධාරීන්ගේ නිල කාර්යය නිසි ලෙස ඉටු කිරීමේ දී බලපෑම් කිරීමේ චෝදනාව මත පොළොන්නරුව, පුද්ගලික සමාගමක GPS තාක්ෂණික කළමණාකරුවෙකු (GROUP GPS MONITORING MANAGER) අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2025.10.22 වන දින ප.ව.7.21ට පමණ පොළොන්නරුව අරලිය සහල් පුද්ගලික සමාගම ඉදිරිපිට ප්‍රධාන මාර්ගයේ දී අත්අඩංගුවට ගන්නා ලදී.

වත්කම් විමර්ශනයක් සම්බන්ධයෙන් සිදු කරනු ලබන විමර්ශනයකට අදාළව කොමිෂන් සභාවට අවශ්‍ය සහාය ලබා නොදීමේ චෝදනාව මත , 2023 අංක 09 දරන දූෂණ විරෝධී පනතේ වගන්ති 126 සහ 127 (1) (උ) ප්‍රකාරව කොමිෂන් සභාවේ නියෝගයක් ක්‍රියාත්මක කිරීම ප්‍රතික්ෂේප කිරීම නොසලකා හැරීම හෝ නොකර හැරීම සහ කොමිෂන් සභාව විසින් විමර්ශන සම්බන්ධව නීත්‍යනුකූලව දෙන විධානයන්ට අනුව සඳහන් කරනු ලබන වේලාවේ දී සහ ස්ථානයේ දී කොමිෂන් සභාව ඉදිරියෙහි පෙනී සිටීම සාධාරණ හේතුවකින් තොරව පැහැර හැරීමට අදාළව ගලෙන්බිඳුණුවැව ප්‍රාදේශීය සභාවේ හිටපු සභාපති විජේවර්ධන මුදියන්සේලාගේ සමන්ත නාමල් විජේවර්ධන යන අය 2025.10.24 වන දින පෙ.ව.11.40ට පමණ ඇල්ලවැව, ගලෙන්බිඳුණුවැව යන ප්‍රදේශයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිළධාරීන් විසින් අත්අඩංගුවට ගන්නා ලදී.

2025.10.09 - කොළඹ - ශ්‍රී ලංකාවේ දූෂණ විරෝධී සටනේ සන්ධිස්ථානයක් සනිටුහන් කරමින් අල්ලස් හෝ දූෂණ චෝදනා විමර්ශන කොමිෂන් සභාව සහ විශ්වවිද්‍යාල ප්‍රතිපාදන කොමිෂන් සභාව අතර අවබෝධතා ගිවිසුමක් කොමිෂන් සභා ප්‍රධාන ශ්‍රවනාගාරයේ දී අත්සන් තබන ලදි.

අඩ්ඩාලචේන ප්‍රදේශයේ පුද්ගලයෙකු විසින් සිදු කරන ලද පැමිණිල්ලක් මත, කොච්චිකච්චේන කුඹුරු යායට ජලය සපයන ඇල මාර්ගය සුද්දකිරීමට පැමිණිලිකරු සභාපතිත්වය දරණ ගොවි සමිතිය මඟින් කරන ලද ඉල්ලීමට අනුව, අක්කරපත්තුව වාරිමාර්ග දෙපාර්තමේන්තුවෙන් ලබා දී ඇති ස්කැවේටර් යන්ත්‍රය සඳහා ගොවි සමිතිය මඟින් ලබාදෙන ඉන්ධන ප්‍රමාණය ප්‍රමාණවත් නොවන බව පවසා, ඒ සඳහා වැඩිපුර ඩීසල් ලීටර් 51ක් වැය වන බවට දන්වා ඒ වෙනුවෙන් රුපියල් දහතුන්දහස් දෙසීයක (රු.13,200/-) මුදලක් අල්ලස් වශයෙන් ඉල්ලා, ලබාගැනීම සහ එම මුදල ලබා ගැනීමට ආධාර අනුබල ලබාදීම යන චෝදනා මත පොතුවිල් ප්‍රාදේශීය වාරිමාර්ග ඉංජිනේරු කාර්යාලයේ කම්කරුවෙකු (යන්ත්‍ර ක්‍රියාකරුවෙකු) සහ අක්කරපත්තුව සහකාර ඉංජිනේරු ඒකක කාර්යාලයේ නඩත්තු කම්කරුවෙකු 2025.10.17 වන දින ප.ව.3.40ට පමණ කොච්චිකච්චේන කුඹුරු යායට යන මාර්ගයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිළධාරීන් විසින් අත්අඩංගුවට ගන්නා ලදී.

මහව ප්‍රදේශයේ පුද්ගලයෙකු විසින් සිදු කරන ලද පැමිණිල්ලකට අනුව, සැකකරු විසින් අනවසරයෙන් අල්ලාගෙන වගා කටයුතු සිදු කරන ලද අක්කර 20ක පමණ ප්‍රමාණයක රජයේ ඉඩමකින් අක්කර 12ක පමණ ප්‍රමාණයක් පැමිණිලිකරු වෙත වගා කටයුතු සිදු කිරීම සඳහා එම ඉඩමට පැමිණිලිකරු මඟින් අක්කරබදු ගෙවූ බවට කුවිතාන්සියක් ලබා දී ඒ සඳහා අවශය කටයුතු සිදු කර දීම සඳහා මුලින් ලක්ෂ 35ක මුදලක් ඉල්ලා එයින් පසුව ලක්ෂ 10ක මුදලක් ලබාගැනීම සහ ඉතිරි ලක්ෂ 25ක මුදලින් රු.1,200,000/-ක (රුපියල් ලක්ෂ දොළහක) මුදලක් අල්ලස් වශයෙන් ඉල්ලා, ලබාගැනීමේ අල්ලස් චෝදනාව මත දියළුම ගොවිජන සේවා මධ්‍යස්ථානයේ කෘෂිකර්ම පර්යේෂණ හා නිෂ්පාදන සහකාරවරයෙකු අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2025.10.16 වන දින ප.ව.12.15ට පමණ තණමල්විල - වැල්ලවාය ප්‍රධාන මාර්ගයේ ඇතිලිවැව නගරයේ අවන්හලක් තුළ දී අත්අඩංගුවට ගන්නා ලදී.

ශ්‍රී ලංකා රාජ්‍ය ඉංජිනේරු සංස්ථාවේ සේවකයින් හා දේපළ නියමිත ක්‍රමවේදය අනුගමනය නොකර එක්සත් ජාතික පක්ෂ මූලස්ථානය “සිරිකොත” ගොඩනැගිල්ල අලුත්වැඩියා කිරීමට යෙදවීමෙන් රාජ්‍ය ඉංජිනේරු සංස්ථාවට රු.1,667,294.87 ක (රුපියල් දහසය ලක්ෂ හැටහත්දහස් දෙසිය අනූ හතරයි ශත අසූ හතයි) පාඩුවක් ද, එක්සත් ජාතික පක්ෂයට අයුතු ලාභයක් ද සිදු කිරීම යන දූෂණ චෝදනාව මත ශ්‍රී ලංකා රාජ්‍ය ඉංජිනේරු සංස්ථාවේ විධායක අධ්‍යක්ෂ (දැනට ව්‍යාපාරික) නිලූ දිල්හාර විජේදාස යන අය 2025.10.16 වන දින පෙ.ව.11.00ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

විදේශ සේවා නියුක්ති කාර්යාංශය සහ ඊශ්‍රායල් රාජ්‍ය අතර වර්ෂ 2023.11.05 දිනැතිව අත්සන් කරන ලද ගිවිසුම ප්‍රකාරව ඊශ්‍රායල් රාජ්‍ය වෙත කෘෂිකර්ම ක්ෂේත්‍රය සඳහා ශ්‍රමිකයන් යොමු කිරීමේ දී, විදේශ රැකියා හා කම්කරු අමාත්‍යවරයා ලෙස තම බලය අවභාවිතා කරමින්, මෙරට ඊශ්‍රායල් කෘෂිරැකියා සඳහා පිටව යාමට බලාපොරොත්තු වූ තැනැත්තන් හට, එකී අවස්ථාව අහිමි කරමින් තෝරාගත් පිරිසක් සඳහා පමණක් එකී අවස්ථාව සලසා, තමා වෙත සහ එකී තෝරාගත් තැනැත්තන් වෙත වාසියක් සහ තවත් පිරිසකට වැරදි සහගත හෝ නීති විරෝධී අලාභයක් සිදු කිරීම තුළින් දූෂණය වරද සිදු කිරීම යන චෝදනාව මත හිටපු කම්කරු හා විදේශ රැකියා අමාත්‍ය මලිගස්සේ මනුෂ නලින් නානායක්කාර යන අය 2025.10.15 වන දින ප.ව.2.31ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

නාගරික සංවර්ධන අධිකාරිය සතු කොළඹ 05, මයුර පෙදෙසේ පිහිටි පර්චස් 55.5 ක ඉඩම් කොටසක් තාවකාලික බදු පදනම මත ලබා දීමේ දී නාගරික සංවර්ධන අධිකාරියට රු. 29,519,666.16 ක මුදලක් පාඩුකිරීම තුළින් දූෂණ වරද සිදුකිරීම මත නාගරික සංවර්ධන අධිකාරියේ හිටපු අධ්‍යක්ෂ ජනරාල් (මේ වන විට විශ්‍රාම ලබා ඇත) සම්පත් සුමේධ පූජිත රත්නායක සහ නාගරික සංවර්ධන අධිකාරියේ හිටපු අධ්‍යක්ෂ (ඉඩම්) හා අභ්‍යන්තර තක්සේරු කමිටුවේ සභාපති (මේ වන විට විශ්‍රාම ලබා ඇත) කොස්වත්ත ලියනගේ වීරවංශ පෙරේරා යන අය අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2025.09.11 වන දින පෙ.ව. 9.30 ට පමණ අත්අඩංගුවට ගන්නා ලදි.

කොමිෂන් සභාවට යොමු කරනු ලැබූ පැමිණිල්ලකට අනුව, පැමිණිලිකරුට නිවසක් ලබාගැනීමට නිවාස සංවර්ධන අධිකාරිය මඟින් අනුමත රු.1,000,000/- (රුපියල් ලක්ෂ දහයක) ආධාර මුදලේ පළමු අදියර වශයෙන් ලැබී ඇති රු.150,000/- ක මුදල, පැමිණිලිකරු ලබාගත් අවස්ථාවේ දී නිවාස සංවර්ධන අධිකාරිය මඟින් පැමිණිලිකරුට ආධාර මුදලේ ඉතිරි මුදල ලබාගැනීමට අවශ්‍ය කටයුතු සලසා දීමට උදවි කරන බව පවසා රු.25,000/- (රුපියල් විසි පන්දහසක) මුදලක් අල්ලස් ලෙස ලබාගැනීමට අදාළව, 2025.09.15 වන දින අල්ලස් කොමිසමේ අත්අඩංගුවට පත් වූ පළවන සැකකරු වන ජාතික නිවාස සංවර්ධන අධිකාරියේ නිවාස නිලධාරී (තාක්ෂණ සහකාර) ගරුසිංහගේ සුරංග ප්‍රසාද් සෝමසිරි යන අයට ආධාර අනුබල දීම යන චෝදනාව මත නියාගම ප්‍රාදේශීය ලේකම් කාර්යාලයේ ආර්ථික සංවර්ධන නිලධාරීයෙකු ලෙස සේවයේ නියුතු ගිරිදරගේ රනිල් නිශාන්ත ජයවර්ධන යන
අය 2025.10.13 වන දින පෙ.ව.11.15ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ දී අත්අඩංගුවට ‌ගන්නා ලදි.