2025 සිට ඉදිරි වසර පහක කාලය තුළ මෙරට  ක්‍රියාත්මක කිරීමට නියමිත එම ජාතික ක්‍රියාකාරී සැලැස්ම එළිදැක්වීම ගරු ජනාධිපති අනුර කුමාර දිසානායක මහතාගේ ප්‍රධානත්වයෙන් 2025.04.09 වන දින පෙ.ව.8.00 සිට 11 00 දක්වා බණ්ඩාරනායක ජාත්‍යන්තර අනුස්මරණ සම්මන්ත්‍රණ ශාලාවේ  දී පැවැත්වීමට නියමිතය. තවද, දිවයින පුරා රාජ්‍ය ආයතන මුල්කර ගනිමින් ජනාධිපති ලේකම්තුමාගේ චක්‍රලේක අංක PS/SB/Circular/2/2025  හා  2025.02.18 දිනැති චක්‍රලේකය ප්‍රකාරව රාජ්‍ය ආයතයන තුල පිහිටුවා ඇති  අභ්‍යන්තර කටයුතු ඒකක ද මෙම ප්‍රධාන උළෙලට සමගාමිව දියත් කිරීමට නියමිත අතර ප්‍රධාන උළෙලේ සමගාමී විද්‍යුත් විකාශනයක් සිදු කිරීමට ද නියමිතය.

ශ්‍රී ලංකා රේගුවේ නිශ්කාෂනය නොවී මෝටර් රථ ප්‍රවාහන දෙපාර්තමේන්තුවේ ලියාපදිංචි කරමින්, දූෂණ අක්‍රමිකතා සිදු කිරීම සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් සිදු කරනු ලබන විමර්ශන කටයුතුවලට අදාළව, තවත් වාහන 12ක් (කොළඹ ප්‍රධාන මහේස්ත්‍රාත් අධිකරණයෙන් ලැබුණු නියෝග මත) අප්‍රේල් මස 01, 02 සහ 03 යන දිනයන්හි දී කොමිෂන් සභා භාරයට ගන්නා ලදි. ඒවා පහත පරිදි වේ.

උතුරු මැද පළාත් සභාවේ ප්‍රධාන අමාත්‍යවරයා ලෙස සිට පුද්ගලික ලේකම්ගේ වාහනය සඳහා ඉන්ධන ඇණවුම්වල සිදුකර ඇති අක්‍රමිකතා මත අල්ලස් පනතේ 70 වගන්තිය ප්‍රකාරව දූෂණ වරද සිදුකළ හිටපු උතුරුමැද පළාත් සභාවේ ප්‍රධාන අමාත්‍ය එස්.එම්.රංජිත් සමරකෝන් සහ පුද්ගලික ලේකම් වන, නවමුණි ආරච්චිගේ ශාන්ති චන්ද්‍රසේන යන අයට 2025.04.02 දින කොළඹ මහාධිකරණ අංක 01හි ගරු විනිසුරු ආදිත්‍ය පටබැඳිගේ මැතිතුමා විසින් දඬුවම් නියම කරන ලදි.

ඌව පළාත් ප්‍රධාන අමාත්‍ය ධූරය දරමින්, පළාත් සභාවේ ව්‍යාපෘතියක් වෙනුවෙන් යැයි පවසමින් රාජ්‍ය බැංකු තුනකින් අනුග්‍රාහකත්ව මුදල් ඉල්ලා, ලබාගැනීමේදී චූදිත නමින් පවතින පදනමක ගිණුමකට මුදල් බැර කරගැනීම ඇතුළු දූෂණ ක්‍රියා සිදුකිරීම සම්බන්ධව ඌව පළාත් සභාවේ හිටපු ප්‍රධාන අමාත්‍යවරයෙකු වන වර්තමාන පාර්ලිමේන්තු මන්ත්‍රී දොන් ආතර් චාමර සම්පත් දසනායක මහතා 2025.03.27 දින ප.ව. 2.25ට අල්ලස් හෝ දූෂණ චෝදනා විමර්ශන කොමිෂන් සභාවේදී අත්අඩංගුවට ගන්නා ලදී.

අල්ලස් හෝ දූෂණ චෝදනා විමර්ශන කොමිෂන් සභාව වෙත ලද පැමිණිලි දෙකක් මත සිදු කරනු ලබන විමර්ශනයන් දෙකකට අදාළව (රජයේ රැකියා ලබා දෙන බවට පවසා අල්ලස් ලෙස රු.200,000/-ක සහ රු.150,000/- ක මුදල් ඉල්ලා ලබාගැනීම සම්බන්ධව) මධ්‍යම පළාත් සභාවේ හිටපු විපක්ෂ නායක (එක්සත් ජාතික පක්ෂයේ) දොන් හරින්ද්‍ර චානක අයිලප්පෙරුම මහතා 2025.03.26 දින පෙ.ව.9.15ට මහනුවර ප්‍රදේශයේදී කොමිෂන් සභාවේ විමර්ශන නිළධාරීන් විසින් අත්අඩංගුවට ගන්නා ලදී.

පුද්ගලයෙකු විසින් ඉල්ලුම් කරන ලද වෙළඳ බල පත්‍රය ලබා දීමට අවශ්‍ය කටයුතු කරදීම සඳහා වෙනත් පුද්ගලයන් දෙදෙනෙකුට රු.2,000,000/-ක (රුපියල් ලක්ෂ විස්සක) මුදල් අල්ලසක් ලබාදෙන ලෙස ඉල්ලීම හා රු.1,500,000/- (රුපියල් ලක්ෂ පහළොවක) මුදල් අල්ලසක් ලෙස ඉල්ලා ලබාගැනීමට අනුබල දීමේ චෝදනා මත හිටපු වෙළඳ හා පරිසර රාජ්‍ය අමාත්‍යවරයෙකු වූ සදාසිවම් වියාලේන්ද්‍රන් 2025.03.25 දින ප.ව.1.20 ට අල්ලස් හෝ දූෂණ චෝදනා විමර්ශන කොමිෂන් සභාවේ දී අත්අඩංගුවට ගන්නා ලදී.

පනාමුර ප්‍රදේශයේ පදිංචි පාරම්පරික වෛද්‍යවරියක විසින් සිදු කරන ලද පැමිණිල්ලකට අනුව, පැමිණිලිකාරියට ආයුර්වේද වෛද්‍ය සභාව මගින් ලබාදෙන පාරම්පරික වෛද්‍යවරයෙකු බවට ලබාදෙන සහතිකය එම දෙපාර්තමේන්තුවේ කොමසාරිස්තුමාගේ අනුදැනුම ඇතිව ලබාදීමේ කටයුතු කරදෙන බව පවසා ඒ වෙනුවෙන් රුපියල් ලක්ෂ 10ක මුදලක් අල්ලස් වශයෙන් ඉල්ලා ඉන් රු.500,000/= (රුපියල් ලක්ෂ පහක) මුදලක් ඉල්ලා ලබාගැනීම සහ ඒ සඳහා ආධාර අනුබල ලබාදීම යන අල්ලස් චෝදනා මත කැළණිය ප්‍රදේශයේ පදිංචි පුද්ගලයෙකු, පිළිමතලාව ප්‍රදේශයේ පදිංචි ව්‍යාපාරිකයෙකු සහ නාවලපිටිය ප්‍රදේශයේ පදිංචි , රාජ්‍ය නොවන සංවිධානයක සම්බන්ධීකාරවරයෙකු 2025.03.22 දින පෙ.ව.11.55 ට පමණ සිනමන් ග්‍රෑන්ඩ් හෝටලය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

2023 අංක 9 දරන දූෂණ විරෝධි පනතේ 80 වන වගන්තිය මඟින් මගින් නිළධාරී/පුද්ගල කාණ්ඩ ගණනාවක් විසින් වත්කම් සහ බැරකම් ප්‍රකාශ කිරීමේ අවශ්‍යතාවය දක්වා ඇති අතර, ඒ සම්බන්ධ නව ප්‍රවනතාවයන් සහ වත්කම් බැරකම් ප්‍රකාශ කිරීමේ ආකෘතිය පිළිබඳ දැනුවත් කිරීමේ වැඩසටහනක් 2025 මාර්තු මස 20 වන දින පෙ.ව. 9.00ට අල්ලස් හෝ දූෂණ චෝදනා විමර්ශන කොමිෂන් සභාවේ ශ්‍රවනාගාරයේදී පවත්වන ලදි.

1994 අංක 19 දරන අල්ලස් හෝ දූෂණ චෝදනා විමර්ශන කොමිෂන් සභා පනතේ බලතල ක්‍රියාත්මක කිරීම සඳහා සිවිල් විමර්ශන නිලධාරීන් බඳවා ගැනීමට 2018.10.27 දින විවෘත තරඟ විභාගයක් සහ 2019.07.04 දින ව්‍යුහගත සම්මුඛ පරීක්ෂණයක් පවත්වන ලදී. එවකට රටේ පැවති කොවිඩ් - 19 වසංගත තත්ත්වය හේතුවෙන් සහ අමාත්‍ය මණ්ඩල තීරණ අනුව සිවිල් විමර්ශන නිලධාරී තනතුරු 200ක් යටපත් කිරීමට ගෙන තිබූ තීරණය නිසා, රාජ්‍ය සේවයේ බඳවා ගැනීම් ක්‍රියාවලිය සමාලෝචනය කිරීමේ කමිටු නිර්දේශ මත , එම බඳවා ගැනීම් අවලංගු කිරීමට සිදුවිය.

ජාතික ලොතරැයි මණ්ඩලයේ සාමාන්‍යාධිකාරී තනතුර සඳහා සුදුසුකම් නොලත් නිලධාරියෙකු පත්කිරීම මඟින් මුදල් අවභාවිතාවක් සිදුකර ඇති බවට කොමිෂන් සභාව වෙත යොමු වූ පැමිණිල්ලක් පිළිබඳව අල්ලස් හෝ දූෂණ චෝදනා විමර්ශන කොමිෂන් සභාවේ ලේකම්වරයා කටයුතු කළ ආකාරය ගැටළු සහගත බවට මාධ්‍ය වාර්තාවන් පළවී ඇත.

කුරුණෑගල, බෞද්ධාලෝක මාවත ප්‍රදේශයේ පදිංචි පුද්ගලයෙකු විසින් සිදු කරන ලද පැමිණිල්ලකට අනුව, පැමිණිලිකරුගේ නමට ලියාපදිංචි කරන ලද සින්නක්කර ඉඩමකට අදාළ ඔප්පුව සඳහා රජයට අයවිය යුතු හිඟ මුද්දර ගාස්තුව අඩුකර සකස්කර දීමට අවශ්‍ය කටයුතු සකසා දීම වෙනුවෙන් රු.50,000/-ක (රුපියල් පනස්දහසක) මුදලක් අල්ලස් ලෙස ඉල්ලා ලබාගැනීම යන අල්ලස් චෝදනා මත වයඹ පළාත් සභාවේ, පළාත් ආදායම් දෙපාර්තමේන්තුවේ සේවය කළ තක්සේරු නිලධාරිනියක 2025.03.17 දින ප.ව.1.05 ට පමණ පළාත් ආදායම් දෙපාර්තමේන්තු කාර්යාලයේ සැකකාරියගේ නිල මේසය අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.