දකුණු කොරියානු දූෂණ විරෝධී සහ සිවිල් අයිතිවාසිකම් කොමිසමේ උප සභාපති හා මහලේකම් චන් සෙන් යුං මහතා ප්‍රමුඛ දූත පිරිසක් 2024 මැයි මස 20 වන දින අල්ලස් හෝ දූෂණ චෝදනා විමර්ශන කොමිෂන් සභාවට පැමිණි අතර දූෂණය මැඩලීම සඳහා ආයතන ද්විත්වය අතර සහයෝගීතාව ප්‍රවර්ධනය කිරීම සම්බන්ධයෙන් එහි දී සාකච්ඡා පවත්වන ලදි. ශ්‍රී ලංකාවේ දකුණු කොරියානු තානාපති මියෝන් ලී මැතිණිය ද මෙම සාකච්ඡාව සඳහා සහභාගී වූ අතර අල්ලස් හෝ දූෂණ චෝදනා විමර්ශන කොමිෂන් සභා සභාපති විනිසුරු නීල් ඉද්දවල මහතා, කොමසාරිස්වරුන් වන බර්නාඩ් රාජපක්ෂ මහතා හා චේතිය ගුණසේකර මහතා, අධ්‍යක්ෂ ජනරාල් කනිෂ්ක විජේරත්න මහතා හා කොමිෂන් සභාවේ ඉහළ මට්ටමේ නිලධාරීන් පිරිසක් ද මෙම සාකච්ඡාව සඳහා සහභාගී වූහ.

රු. 10,000/- ක මුදලක් අල්ලස් වශයෙන් ඉල්ලා ලබා ගැනීම සම්බන්ධව අල්ලස් හෝ දූෂණ චෝදනා විමර්ශන කොමිෂන් සභාව මගින් ලුණුගම්වෙහෙර පොලිස් ස්ථානයේ පොලිස් සැරයන්වරයෙකුට සහ කොස්තාපල්වරයෙකුට එරෙහිව නඩු අංක එච්.සී.බී 2016/2014 මගින් ගොනු කළ නඩුවකට අදාළව, මෙහි දෙවන චූදිත වූ පොලිස් කොස්තාපල්වරයා විසින් වරද පිළිගැනීම මත 2024.05.27 වන දින කොළඹ මහාධිකරණ අංක 02 හි ගරු විනිසුරු අමල් රණරාජා මැතිතුමන් විසින් දඬුවම් නියම කරන ලදී. මෙම නඩු විභාගයවන අතර කාලයේදී පළමු චූදිත වූ පොලිස් සැරයන් මිය ගොස් ඇති අතර දෙවන චූදිතට එරෙහිව නඩුව පවත්වාගෙන යන ලදී.

ඇහැලියගොඩ, ඇහැලියගොඩවත්ත ප්‍රදේශයේ පදිංචිකරුවකු විසින් කරන ලද පැමිණිල්ලකට අනුව, ඇහැලියගොඩ ප්‍රදේශයේ දමිල මාධ්‍ය පාසලක අධ්‍යාපනය ලබන සිසුන් සඳහා රජයේ ප්‍රතිපත්තියක් මත ලබා දෙන උදෑසන ආහාරය 2024 මාර්තු හා අප්‍රේල් මස සඳහා ලබාදීම වෙනුවෙන් හා එම ටෙන්ඩරය දිගටම කරදරයකින් තොරව පවත්වාගෙන යාමට අවස්ථාව ලබාදීමටත්, ආහාර නිසි පරිදි ලබා දෙන බවට නිර්දේශ කර නියමිත මුදල් ටෙන්ඩර් හිමිකාරියට ලබා දීම වෙනුවෙන් මාස 02 සඳහා රු.50,000/-ක මුදලක් ඉල්ලා, එයින් පළමුව රු.20,000/- මුදලක් ලබාගෙන ඉතිරි රු.30,000/-ක මුදල අල්ලස් වශයෙන් ඉල්ලා ලබා ගැනීමේ චෝදනාව මත ඇහැලියගොඩ දමිල මාධ්‍ය පාසලක විදුහල්පතිවරයෙකු 2024.05.21 වන දින ප.ව 12.43ට පමණ අදාළ විද්‍යාලයේ, විදුහල්පති නිල කාමරය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

රජවැල්ල, කුඹුක්කඳුර ප්‍රදේශයේ පදිංචිකාරියක විසින් කරන ලද පැමිණිල්ලකට අනුව, පැමිණිලිකාරිය ගොනුකර ඇති දික්කසාද නඩුවට අදාළ නඩු තීන්දුව ලබා දී දික්කසාද සහතිකය ලබාදීම සඳහා රුපියල් 4,500/=ක (හාරදහස් පන්සියයක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත උඩදුම්බර,මැදදුම්බර හා පාතදුම්බර (උඩතලවින්න) ක්වාසි උසාවියේ, ක්වාසි විනිසුරුවරයෙකු 2024.05.25 වන දින ප.ව 12.46ට පමණ උඩතලවින්න ක්වාසි උසාවිය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

ඩයගම, ඩයගම බසාර් ප්‍රදේශයේ පදිංචි පුද්ගලයෙකුගේ, බැංකුවට උකස් කළ ඉඩම හා පදිංචි නිවස වෙන්දේසියෙන් නතර කර ඒ සඳහා සහනයක් ලබාදීමට රු.10,000/- ක අල්ලස් මුදලක් අයැදීම හා භාර ගැනීම යන චෝදනාවන් දෙක යටතේ තලවකැලේ, ලිඳුල ආගරපතන ග්‍රාම නිලධාරිවරයෙකුට එරෙහිව අල්ලස් පනතේ 19 (ඇ) වගන්තිය යටතේ ගොණුකළ නඩුවකට අදාළව, 2024.05.06 කොළඹ මහාධිකරණ විනිසුරුතුමන් විසින් දඬුවම් නියම කරන ලදි.

2024.05.14 වන දින ශ්‍රී ලංකා මූල්‍ය බුද්ධි ඒකකය (FIU) සහ අල්ලස් හෝ දූෂණ චෝදනා විමර්ශන කොමිෂන් සභාව අතර අවබෝධතා ගිවිසුමක් අත්සන් කිරීමට යෙදුණි. අල්ලස් හෝ දූෂණ චෝදනා විමර්ශන කොමිෂන් සභාව වෙනුවෙන් අධ්‍යක්‍ෂ ජනරාල් ඩබ්ලිව්. කේ. ඩී. විජේරත්න මහතා සහ ශ්‍රී ලංකා මූල්‍ය බුද්ධි ඒකකය වෙනුවෙන් එහි අධ්‍යක්ෂිකා සුභාණි කීර්තිරත්න මහත්මිය විසින් මෙම ගිවිසුම අත්සන් කරන ලදී.

උක්ත කරුණට අදාළව, බොරැල්ල, කින්සි පාරේ, සුඛෝපභෝගී නිවෙසක් මිල දී ගැනීමේ සිද්ධිය සම්බන්ධව ඇතැම් මාධ්‍ය විසින් වාර්තා කිරීමේ දී මෙම සිද්ධියට අදාළ විමර්ශන හා නඩු පැවරීම් කටයුතු අල්ලස් හෝ දූෂණ චෝදනා විමර්ශන කොමිෂන් සභාව මගින් සිදු කළ බව සඳහන් කර ඇත.

ඇල්පිටිය ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව රුපියල් 200,000/- ක අල්ලස් මුදලක් ලබා ගැනීමේදී සම්බන්ධව කොට්ටාව පොලිස් ස්ථානයේ පොලිස් සැරයන්වරයෙක්, පොලිස් කොස්තාපල්වරයෙක් සහ හෝමාගම ප්‍රදේශයේ පුද්ගලයෙක් කොට්ටාව මංසන්ධිය අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2024.05.08 දින ප.ව. 7.25 ත් - ප.ව. 8.35 ත් අතර කාලසීමාවේදී අත්අඩංගුවට ගන්නා ලදී.

2023 අංක 09 දරන දූෂණ විරෝධී පනතේ 112 වගන්තිය ප්‍රකාරව මුදල් විශුද්ධිකරණය සම්බන්ධයෙන්වන වැරදි විමර්ශනය කිරීමේ වගකීම අල්ලස් හෝ දූෂණ චෝදනා විමර්ශන කොමිෂන් සභාව වෙත පවරා ඇත. එම වගකීම සහ දේශීය සහ අන්තර්ජාතික වශයෙන් ද කොමිෂන් සභාව වෙත පවරා ඇත. විශේෂයෙන්ම මූල්‍ය ක්‍රියාකාරී කාර්ය සාධක බලකාය යටතේ ශ්‍රී ලංකාව 2025 මාර්තු මාසයේදී මෙම කරුණු පිලිබඳ අන්‍යෝන්‍ය සමාලෝචනයකට ලක්වීමට නියමිතව ඇත. එමෙන්ම අන්තර්ජාතික මූල්‍ය අරමුදල මගින් ද මුදල් විශුද්ධිකරණය සම්බන්ධයෙන්වන විමර්ශන සහ නඩු මෙහෙයවීමේ ක්‍රියාවලිය ශක්තිමත් කිරීමේ වැදගත්කම ඉස්මතු කොට ඇත. එම දේශීය සහ අන්තර්ජාතික අවශ්‍යතාවයන් සැලකිල්ලට ගනිමින් අල්ලස් හෝ දූෂණ චෝදනා විමර්ශන කොමිෂන් සභාවේ මුදල් විශුද්ධිකරණය සඳහා වූ නවතම ඒකකයක් ස්ථාපිත කර ඇත. ඒ සඳහා දැනට කොමිෂන් සභාව තුළ සිටින නිලධාරීන් කීපදෙනෙක්ම නම් කර ඇති අතර, තවදුරටත් විශේඥ හැකියාවෙන් යුතු නිලධාරීන් ද බඳවා ගැනීමට කොමිෂන් සභාව අපේක්ෂා කර ඇත.

කොල්ලුපිටිය ප්‍රදේශයේ පිහිටි පැමිණිලිකරු විසින් බලාගන්නා නිවස පරීක්ෂාකර, පැමිණිලිකරුට අයත් රු. එක්කෝටි විසි ලක්ෂයක (රු.12,000,000) ක හා ඩොලර් තුන්දහස් පන්සියයක (3,500)ක මුදලක් (පැමිණිලිකරුට විරුද්ධව විමර්ශනයක් පවතින බව දන්වා) අපරාධ පරීක්ෂණ දෙපාර්තමේන්තුවේ නිලධාරීන් ලෙස සඳහන් කරමින් රැගෙන ගොස් ඇත. පසුව පැමිණ එම නිවසේ සේවයට සිටි ඉන්දියන් ජාතිකයාගේ විදේශ ගමන් බලපත්‍රය රැගෙන ගොස් පසුව පැමිණිලිකරුගේ දුරකතනයට ඇමතුම් ලබා ගෙන ඔහුට විරුද්ධ විමර්ශනයට උදව් කිරීමට සහ රැගෙන යන ලද විදේශ ගමන් බලපත්‍රය නැවත ලබා දීමට රුපියල් කෝටි 04ක් අල්ලස් වශයෙන් ඉල්ලා අදාළ මුදල රුපියල් කෝටි 3 ½ක් දක්වා අඩුකර මුල් කොටස ලෙස රුපියල් කෝටියක (රු.10,000,000) මුදලක් අල්ලස් වශයෙන් ලබා ගැනීම සම්බන්ඳව සැකකරුවන් තිදෙනෙකු හා එක් සැකකාරියක අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් 2024.04.29 වන දින ප.ව. 3.30 ට පමණ කොල්ලුපිටිය ප්‍රදේශයේ පිහිටි අදාළ නිවසේදී අත්අඩංගුවට ගන්නා ලදී.

පුත්තලම, වෙට්ටාලෙයි ප්‍රදේශයේ පදිංචිකාරියක විසින් කරන ලද පැමිණිල්ලකට අනුව, ක්වාසි උසාවියේ ලබා දී ඇති දික්කසාද නඩු තීන්දුවකට අදාළව, දික්කසාද සහතිකය ලබාදීමට අවශ්‍ය කටයුතු සිදු කර, එම සහතිකය ලබා දීම සඳහා රුපියල් 5,000/=ක (පන්දහසක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත පුත්තලම, ක්වාසි උසාවියේ, ක්වාසි විනිසුරුවරයෙකු 2024.04.23 වන දින ප.ව 02.30ට පමණ පුත්තලම, ක්වාසි උසාවිය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි. 

ජපාන තානාපති මිසුකෝෂි හිදේකි මහතා සහ දෙවන ලේකම් කෝරි ඉමායි මහත්මිය සමග වැදගත් සාකච්ඡාවක් අල්ලස් හෝ දූෂණ චෝදනා විමර්ශන කොමිෂන් සභාවේ සභාපති, කොමසාරිස්වරුන් හා අධ්යක්ෂ ජනරාල් විසින් 2024 මාර්තු 21 වන දින පවත්වන ලදි. මෙම රැස්වීම සඳහා එක්සත් ජාතීන් ගේ සංවර්ධන වැඩසටහනෙහි (UNDP) නියෝජිතයන් ද ජපාන අන්තර්ජාතික සහයෝගීතා ආයතනයේ (JAICA) නියෝජිතයන් ද සහභාගී වූහ.