හන්තාන පාර, මහනුවර ප්‍රදේශයේ පදිංචිකාරියක විසින් කරන ලද පැමිණිල්ලකට අනුව, පැමිණිලිකාරියගේ කැමැත්තෙන් තොරව, ඇය පදිංචි නිවසෙන් කාමර 02කට, ඇයගේ පුතාගේ නමට විදුලිය ලබාගැනීමට කටයුතු කිරීමේ දී විදුලි බලමණ්ඩලයට ග්‍රාම නිලධාරි විසින් ලබාදිය යුතු පදිංචි සහතිකය ලබා නොදී සිටීමට අවශ්‍ය රාජකාරී කටයුතු නොකර සිටීම සඳහා රුපියල් 25,000/=ක (විසිපන්දහසක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත ගඟවටකෝරළය ප්‍රාදේශීය ලේකම් කාර්යාලයේ සේවයේ නියුතු ග්‍රාම නිලධාරීවරයෙකු 2024.06.25 වන දින ප.ව 12.19ට පමණ හිරැස්සගල ග්‍රාම නිලධාරී කාර්යාලය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

දැනට රක්ෂිත බන්ධනාගාර ගතව සිටින හිටපු අමාත්‍ය කෙහෙලිය රඹුක්වැල්ල මහතා වෙත සෞඛ්‍ය අමාත්‍යවරයා වශයෙන් කටයුතු කරමින් සිටිය දී එම අමාත්‍යංශය මගින් නිකුත් කොට තිබූ නිල රථ 02ක් අමාත්‍ය ධූරය අහිමිවීමෙන් පසුව ද ආපසු භාර නොදී අවභාවිතා කරන බවට සිවිල් පුරවැසියෙකු විසින් කරන ලද පැමිණිල්ලකට අනුව, අල්ලස් හෝ දූෂණ චෝදනා විමර්ශන කොමිෂන් සභාව විමර්ශනයක් ආරම්භකර ඇත.

අක්කරපත්තුව ප්‍රදේශයේ පදිංචිකරුවකු විසින් කරන ලද පැමිණිල්ලකට අනුව, කණින ලද වැලි හා පස් වාරිමාර්ග කාර්යාලයට අයත් කලපු හා කුඹුරු ඉඩම්වලට බෑම නීති විරෝධී බවට පවසා, ඒ සඳහා ප්‍රදේශයේ ඇති වෙනත් රජයේ ආයතන වල ද සහාය ලබාගෙන නීති මගින් කටයුතු නොකර සිටීමට අල්ලස් වශයෙන් මුලින් රුපියල් ලක්ෂ 04ක මුදලක් ඉල්ලා, එම මුදල රුපියල් ලක්ෂ 02ක් දක්වා අඩුකර ඉල්ලා, එකී රුපියල් ලක්ෂ 02ක මුදලක් රියදුරු මාර්ගයෙන් ලබා ගැනීම මත ප්‍රාදේශීය වාරිමාර්ග ඉංජිනේරුවකු අක්කරපත්තුව වාරිමාර්ග කාර්යාලයේ දී 2024.06.12 වන දින ප.ව 5.50ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

ග්‍රීසිය දැඩි ආර්ථික අර්බුදයකට ලක්ව තිබිය දී, ග්‍රීක රජයේ බැඳුම්කර ආයෝජනයක් සිදුකිරීම තුළින් රජයට රු.1,843,267 ,595/- ක පාඩුවක් සිදුකිරීම හේතු කොටගෙන එවකට මහ බැංකු අධිපති අජිත් නිවාඩ් කබ්රාල් සහ තවත් හතරදෙනෙකු චූදිතයන් කරමින් අල්ලස් කොමිසම විසින් 2024-03-26 දින අධිචෝදනා ගොනුකර තිබුණි.

ශ්‍රී ලංකා රේගුවේ නිශ්කාෂනය නොවූ වාහන, මෝටර් රථ ප්‍රවාහන දෙපාර්තමේන්තුවේ ලියාපදිංචි කරමින් රජයට ලැබිය යුතු වූ බදු ආදායම් ලැබීමේ අවස්ථාව අහිමි කරමින්, සිදු කරගෙන ගිය අනීතික ක්‍රියාවලියක් පිළිබඳව අල්ලස් හෝ දූෂණ චෝදනා විමර්ශන කොමිෂන් සභාව විසින් මේ වන විට විමර්ශන සිදු කරගෙන යමින් පවතී.

ශ්‍රී ලංකා රේගුවේ නිශ්කාෂනය නොවූ මෝටර් රථ ඇතුළු වාහන 400කට ආසන්න ප්‍රමාණයක් අනීතික ලෙස මෝටර් රථ ප්‍රවාහන දෙපාර්තමේන්තුවේ දත්ත පද්ධතියට ඇතුළත් කොට ලියාපදිංචි කර ඇති බවට ලැබුණු තොරතුරු මත, අල්ලස් හෝ දූෂණ චෝදනා විමර්ශන කොමිෂන් සභාව විසින් අධිකරණයට කරුණු ඉදිරිපත් කිරීමෙන් අනතුරුව, එම වාහන අතරින් වාහන 168ක පැවරීම් කටයුතු අත්හිටුවීම සඳහා මෝටර් රථ ප්‍රවාහන කොමසාරිස් ජනරාල් වෙත ගරු අධිකරණයෙන් නියෝග ලබා දී ඇත.

ග්‍රීසිය දැඩි ආර්ථික අර්බුදයකට ලක්ව තිබිය දී, ග්‍රීක රජයේ බැඳුම්කර ආයෝජනයක් සිදුකිරීම තුළින් රජයට රු.1,843,267 ,595/- ක පාඩුවක් සිදුකිරීම හේතු කොටගෙන එවකට මහ බැංකු අධිපති අජිත් නිවාඩ් කබ්රාල් සහ තවත් හතරදෙනෙකු චූදිතයන් කරමින් අල්ලස් කොමිසම විසින් 2024-03-26 දින අධිචෝදනා ගොනුකර තිබුණි.

හිටපු මුදල් අමාත්‍යවරයෙක් වන රවී කරුණානායක මහතා විසින් ප්‍රාථමික වෙළඳ සමාගමක අධ්‍යක්ෂවරයෙක් වූ අර්ජුන් අලෝසියස් මහතා ගෙන් නිවාස සංකීර්ණයක නිවසක් ලබා ගැනීම සම්බන්ධයෙන් වූ අල්ලස් නඩුව සම්බන්ධයෙන් අභියාචනා කිරීම සඳහා වූ අවසරය ශ්‍රේෂ්ඨාධිකරණය විසින් 2024 මැයි 17 වන දින ලබා දෙන ලදි.

සිවිල් ගුවන් සේවා අධිකාරියේ ස්ථාපිත කර නොමැති තනතුරක් සඳහා නිලධාරියෙකු පත් කිරීමෙන් දූෂණයක් සිදුකිරීම සම්බන්ධයෙන් හිටපු සිවිල් ගුවන් සේවා අමාත්‍යවරයෙකුට හා සිවිල් ගුවන් සේවා අධිකාරියේ සම්බන්ධීකරණ ලේකම්වරයෙකුට එරෙහිව ලද පැමිණිල්ලකට අදාළව විමර්ශන කටයුතු අල්ලස් හෝ දූෂණ චෝදනා විමර්ශන කොමිෂන් සභාව විසින් සිදු කරන ලදී.

දකුණු කොරියානු දූෂණ විරෝධී සහ සිවිල් අයිතිවාසිකම් කොමිසමේ උප සභාපති හා මහලේකම් චන් සෙන් යුං මහතා ප්‍රමුඛ දූත පිරිසක් 2024 මැයි මස 20 වන දින අල්ලස් හෝ දූෂණ චෝදනා විමර්ශන කොමිෂන් සභාවට පැමිණි අතර දූෂණය මැඩලීම සඳහා ආයතන ද්විත්වය අතර සහයෝගීතාව ප්‍රවර්ධනය කිරීම සම්බන්ධයෙන් එහි දී සාකච්ඡා පවත්වන ලදි. ශ්‍රී ලංකාවේ දකුණු කොරියානු තානාපති මියෝන් ලී මැතිණිය ද මෙම සාකච්ඡාව සඳහා සහභාගී වූ අතර අල්ලස් හෝ දූෂණ චෝදනා විමර්ශන කොමිෂන් සභා සභාපති විනිසුරු නීල් ඉද්දවල මහතා, කොමසාරිස්වරුන් වන බර්නාඩ් රාජපක්ෂ මහතා හා චේතිය ගුණසේකර මහතා, අධ්‍යක්ෂ ජනරාල් කනිෂ්ක විජේරත්න මහතා හා කොමිෂන් සභාවේ ඉහළ මට්ටමේ නිලධාරීන් පිරිසක් ද මෙම සාකච්ඡාව සඳහා සහභාගී වූහ.

රු. 10,000/- ක මුදලක් අල්ලස් වශයෙන් ඉල්ලා ලබා ගැනීම සම්බන්ධව අල්ලස් හෝ දූෂණ චෝදනා විමර්ශන කොමිෂන් සභාව මගින් ලුණුගම්වෙහෙර පොලිස් ස්ථානයේ පොලිස් සැරයන්වරයෙකුට සහ කොස්තාපල්වරයෙකුට එරෙහිව නඩු අංක එච්.සී.බී 2016/2014 මගින් ගොනු කළ නඩුවකට අදාළව, මෙහි දෙවන චූදිත වූ පොලිස් කොස්තාපල්වරයා විසින් වරද පිළිගැනීම මත 2024.05.27 වන දින කොළඹ මහාධිකරණ අංක 02 හි ගරු විනිසුරු අමල් රණරාජා මැතිතුමන් විසින් දඬුවම් නියම කරන ලදී. මෙම නඩු විභාගයවන අතර කාලයේදී පළමු චූදිත වූ පොලිස් සැරයන් මිය ගොස් ඇති අතර දෙවන චූදිතට එරෙහිව නඩුව පවත්වාගෙන යන ලදී.

ඇහැලියගොඩ, ඇහැලියගොඩවත්ත ප්‍රදේශයේ පදිංචිකරුවකු විසින් කරන ලද පැමිණිල්ලකට අනුව, ඇහැලියගොඩ ප්‍රදේශයේ දමිල මාධ්‍ය පාසලක අධ්‍යාපනය ලබන සිසුන් සඳහා රජයේ ප්‍රතිපත්තියක් මත ලබා දෙන උදෑසන ආහාරය 2024 මාර්තු හා අප්‍රේල් මස සඳහා ලබාදීම වෙනුවෙන් හා එම ටෙන්ඩරය දිගටම කරදරයකින් තොරව පවත්වාගෙන යාමට අවස්ථාව ලබාදීමටත්, ආහාර නිසි පරිදි ලබා දෙන බවට නිර්දේශ කර නියමිත මුදල් ටෙන්ඩර් හිමිකාරියට ලබා දීම වෙනුවෙන් මාස 02 සඳහා රු.50,000/-ක මුදලක් ඉල්ලා, එයින් පළමුව රු.20,000/- මුදලක් ලබාගෙන ඉතිරි රු.30,000/-ක මුදල අල්ලස් වශයෙන් ඉල්ලා ලබා ගැනීමේ චෝදනාව මත ඇහැලියගොඩ දමිල මාධ්‍ය පාසලක විදුහල්පතිවරයෙකු 2024.05.21 වන දින ප.ව 12.43ට පමණ අදාළ විද්‍යාලයේ, විදුහල්පති නිල කාමරය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.