ගම්පොළ, ඉල්ලවතුර ප්‍රදේශයේ පදිංචිකරුවකු විසින් කරන ලද පැමිණිල්ලකට අනුව, පැමිණිලිකරු සම්බන්ධයෙන් අල්ලස් කොමිසම සිදු කරන පරීක්ෂණයකට අදාළව ප්‍රකාශයක් ලබා දීමට අල්ලස් කොමිසම වෙත 2024.10.25 වන දින යාම සඳහා රථයට ඉන්ධන ලබාගැනීමට හා මග වියදම් ලෙස රු.20,000/= ක මුදලක් අල්ලස් ලෙස ඉල්ලා ලබාගැනීමේ අල්ලස් චෝදනාව මත ස්ථානාධිපති පාලන, මූලස්ථාන පොලීසිය - ගම්පොළ කාර්යාලයේ ප්‍රධාන පොලිස් පරීක්ෂකවරයෙකු අල්ලස් චෝදනා මත 2024.10.23 වන දින ප.ව.5.25ට පමණ ගම්පොළ නගරය ආසන්නයේ නුවරඑළිය පාර පිහිටි ආපන ශාලාවක් තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

2024 ඔක්තෝම්බර් මස 05වන දින, කුරුණෑගල ‘මහගෙදර’ රජයේ සම්මන්ත්‍රණ ශාලාවේ දී උතුරු මැද හා වයඹ පළාත් කම්කරු නිලධාරීන් 52 දෙනෙකු සඳහා අල්ලස් හා දූෂණ නිවාරණ වැඩසටහනක් පවත්වන ලදී. මෙම වැඩසටහන සඳහා අල්ලස් හෝ දූෂණ චෝදනා විමර්ශන කොමිෂන් සභවේ දූෂණ නිවාරණ නිලධාරිනී J.L.A උදේශිකා මධුභාෂනි මහත්මිය, දූෂණ නිවාරණ නිලධාරිනී M.A. රුශාන්ති දිල්ශානි මහත්මිය හා කැලණිය විශ්වවිද්‍යාලයේ ජ්‍යෙෂ්ඨ කථිකාචාර්ය තරිඳු ධනංජය වීරසිංහ මහතා සම්පත් දායකත්වය ලබා දෙන ලදී. මෙම වැඩසටහන තුලින් ධනාත්මක චින්තනය, අල්ලස දූෂණය වැලැක්වීම හා එහි ප්‍රතිවිපාක සම්බන්ධයෙන් ද, ඒ පිළිබඳව ඔවුනට පවතින ගැටළු හා සුපිළිපන්නභාවය යන සංකල්පය පිළිබඳවත්, නව දූෂණ විරෝධී පනත පිළිබඳවත් දැනුවත් කිරීම සිදු කරන ලදී.

මඩකලපුව, චෙන්කල්අඩි ප්‍රදේශයේ පදිංචිකරුවකු විසින් කරන ලද පැමිණිල්ලකට අනුව, පැමිණිලිකරු මඩකලපුව සතුරුකොන්ඩාන් ප්‍රදේශයේ පර්චස් 65ක ඉඩමක් රුපියල් කෝටියකට මිල දී ගැනීමෙන් පසුව එහි මුද්දර ගාස්තු වශයෙන් රුපියල් ලක්ෂ 06ක් ගෙවූ පසු නැවත පළාත් ආදායම් කාර්යාලය මඟින් එහි තක්සේරු වටිනාකම රුපියල් කෝටි දෙකයි ලක්ෂ 65ක් වන බව දන්වා ඒ සඳහා දඩ මුදලත් සමඟ ගෙවිය යුතු රජයේ ගාස්තුව රුපියල් 850,000/- ක් බව පවසා එම මුදල රුපියල් ලක්ෂ 02 දක්වා අඩුකර දීමට අවශ්‍ය කටයුතු සලසා දීමට රුපියල් ලක්ෂ 02ක මුදලක් අල්ලස් වශයෙන් ඉල්ලා ලබා ගැනීමේ චෝදනාව මත නැගෙනහිර පළාත්, පළාත් ආදායම් දෙපාර්තමේන්තුවේ නියෝජ්‍ය කොමසාරිස්වරයෙකු 2024.10.15 වන දින ප.ව.12.45ට පමණ නැගෙනහිර පළාත් ආදායම් දෙපාර්තමේන්තුවේ මඩකලපුව කාර්යාලයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

ඔක්තෝබර් මස 01 වන දිනට යෙදෙන ලෝක ළමා දිනය නිමිත්තෙන් මෙවර අල්ලස් හෝ දූෂණ චෝදනා විමර්ශන කොමිෂන් සභාව විසින් 2024 ඔක්තෝබර් මස 01 වන දින සුහද විවාදයක් සංවිධානය කරනු ලැබීය. අල්ලස හා දූෂණය තුරන් කරමින් ශ්‍රී ලංකාව සුපිළිපන් දේශයක් බවට පත් කිරීමේ පරමාර්ථය පෙරදැරිව පවත්වනු ලැබූ මෙම සුහද විවාදය “අල්ලස සහ දූෂණය තුරන් කර සුපිළිපන්න ශ්‍රී ලංකාවක් ගොඩනැංවීම උදෙසා නීතිය ක්‍රියාත්මක කිරීම පමණක් ම ප්‍රමාණවත් නොවේ” සහ “අල්ලස සහ දූෂණය තුරන් කර සුපිළිපන්න ශ්‍රී ලංකාවක් ගොඩනැංවීම උදෙසා නීතිය ක්‍රියාත්මක කිරීම පමණක් ප්‍රමාණවත් වේ” යන මාතෘකාවන් ඔස්සේ නුගේගොඩ, අනුලා විද්‍යාලය සහ කොළඹ රාජකීය විද්‍යාලයේ සිසුන් අතර පැවැත්වුණි.

අල්ලස් හෝ දුෂණ චෝදනා විමර්ශන කොමිෂන් සභාවේ රහසිගත හා බුද්ධි විමර්ශන ඒකකය වෙත ලද තොරතුරක් මත ශ්‍රි ලංකා රේගුවේ නිෂ්කාශනය නොවු වාහන සම්බන්ධයෙන් සිදු කරන ලද විමර්ශනය මගින් භාරයට ගන්නා ලද මිට්ෂුබිසි ජිප් රථයක් අධිකරණ නියෝග පරිදි 2024.10.11 වන දින භාර දෙන ලද අතර එම වාහනය කොළඹ ප්‍රධාන මහේස්ත්‍රාත් වෙත ඉදිරිපත් කිරිමෙන් අනතුරව ඉදිරි රේගු විමර්ශන සදහා ශ්‍රි ලංකා රේගුව වෙත භාර ගන්නා ලෙසට කොළඹ ප්‍රධාන මහේස්ත්‍රාත් තිළිණ ගමගේ මැතිතුමන් විසින් නියෝග ලබාදෙන ලදි.

2023 අංක 9 දරන දූෂණ විරෝධී පනතේ 25 (2) වගන්තිය ප්‍රකාරව 2024.10.07 වන දින පුරප්පාඩු වී ඇති කොමිෂන් සභාවේ අධ්‍යක්ෂ ජනරාල් ධූරය සඳහා මාස 03ක කාලයක් ඇතුළත නව පත්කීරීමක් සිදු කරන ‌තෙක් ගරු ජනාධිපතිතුමන් විසින් දැනට කොමිෂන් සභාවේ අතිරේක අධ්‍යක්ෂ ජනරාල් ධුරයේ කටයුතු කරනු ලබන එම්.ආර්.වයි.කේ.උඩවෙල මහත්මිය වෙත කොමිෂන් සභාවට සහාය දැක්වීම පිණිස අධ්‍යක්ෂ ජනරාල්වරයාගේ බලතල, කාර්යය හෝ කර්තව්‍යය පවරා දී ඇත.

බස් රථ තුනක් සඳහා පරම අයිතිය වෙනස් කර පවරාගැනීමේ කටයුතු සඳහා අල්ලස් ඉල්ලා ලබාගත්, මොටර් රථ ප්‍රවාහන දෙපාර්තමේන්තුවේ නියෝජ්‍ය මෝටර් රථ කොමසාරිස්වරයෙකු, සංවර්ධන සහකාරවරයෙකු සහ තැරැව්කරුවෙකු අල්ලස් චෝදනා මත අත්අඩංගුවට.

අල්ලස් හෝ දූෂණ චෝදනා විමර්ශන කොමිෂන් සභාව වෙත ලද තොරතුරකට අනුව රහසිගත හා බුද්ධි විමර්ශන ඒකකය මගින් සිදු කරනු ලබන විමර්ශනයකට අදාලව අනීතිකව ලංකාවට රැගෙන විත් රජයට අය විය යුතු බදු මුදල් අහිමි කරමින් මෝටර් රථ ප්‍රවාහන දෙපාර්තමේන්තුවේ ලියාපදිංචි කර ධාවනය කරන ලද මිට්ෂුබිසි වර්ගයේ ජීප් රථයක් 2024.09.18 වන දිනට පෙර අල්ලස් හෝ දූෂණ චෝදනා විමර්ශන කොමිෂන් සභාවට ඉදිරිපත් කිරීමට ලබාදුන් අධිකරණ නියෝගය කඩ කිරීම හේතුවෙන් කොළඹ ප්‍රධාන මහේස්ත්‍රාත් අධිකරණය මඟින් නඩු අංක B 16054/01/24 දරණ නඩුවට අදාලව බදුල්ල, නෙළුම්ගම ප්‍රදේශයේ ව්‍යාපාරිකයෙකුට එරෙහිව නිකුත් කර ඇති වරන්තුව ක්‍රියාත්මක කිරීම හා අධිකරණ නියෝග පරිදි අදාල මිට්ෂුබිසි වර්ගයේ ජීප් රථය භාරයට ගැනීමට කොමිෂන් සභාවේ රහසිගත හා බුද්ධි විමර්ශන ඒකකය විසින් කටයුතු කරන ලදී.

කොමිෂන් සභාවට ලද පැමිණිල්ලක් ප්‍රකාරව වනාතවිල්ලුව පොලිස්ථානයේ, හිටපු ස්ථානාධිපතිවරයෙකු වන ලියන පතිරැන්නැහැලාගේ නාලින්ද උපුල් පතිරත්න යන අයට එරෙහිව ලිංගික අල්ලස් ඉල්ලීමේ චෝදනාව මත, අල්ලස් හෝ දූෂණ චෝදනා විමර්ශන කොමිෂන් සභාව විසින් 2024 ඔක්තෝබර් මස 01 වන දින කොළඹ මහාධිකරණයේ නඩු පැවරීමට කටයුතු කරන ලදි.

කොමිෂන් සභාවට ලද පැමිණිල්ලක් ප්‍රකාරව අල්ලස් හෝ දූෂණ චෝදනා විමර්ශන කොමිෂන් සභාව විසින් සෞඛ්‍ය අමාත්‍යාංශයේ ශල්‍යාගාර ලාම්පු 35 ක් මිළදී ගැනීමේ ටෙන්ඩරයේ සිදු වූ දූෂණයක් පිළිබඳ විමර්ශන සිදුකරන ලදී.

පස්සර ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව පැමිණිලිකරු බස්නාහිර පළාත (දකුණ) දිසා රථවාහන කොට්ඨාසයේ, බත්තරමුල්ල ඒකකයට අනුයුක්තව සිටිය දී රථවාහන සම්බන්ධයෙන් වැලිකඩ පොලිස් ස්ථානයේ විශේෂ රාජකාරියේ යෙදී සිටි කාලය තුළ සිදු කරන ලද බීමත් රියදුරන් අත්අඩංගුවට ගැනීම සම්බන්ධයෙන්, පොලිස් දෙපාර්තමේන්තුව මගින් පිරිනමනු ලබන ත්‍යාග මුදල් ලබාගැනීමට ඉදිරිපත් කරනු ලබන ත්‍යාග වව්චර්පත් උසාවි කටයුතු භාර නිලධාරියාගේ අත්සන සහ නිල මුද්‍රාව තබා සම්පූර්ණ කර ලබාදීමට අල්ලස් වශයෙන් තුටු පඬුරක් ලෙස රුපියල් 3640/- ක් වටිනා අරක්කු බෝතලයක් අල්ලස් වශයෙන් ඉල්ලා ලබා ගැනීමේ සහ එම තුටු පඬුර ඉල්ලා ලබාගැනීමට ආධාර අනුබල ලබා දීමේ චෝදනාව මත කෙසෙල්වත්ත පොලිස් ස්ථානයේ, පොලිස් සැරයන්වරයෙකු සහ පිරිසිදු කිරීමේ සේවා ආයතනයක, පිරිසිදු කිරීමේ කම්කරුවෙකු 2024.09.26 වන දින ප.ව. 1.50 ට සහ ප.ව.1.35ට පමණ කොළඹ අළුත්කඩේ ප්‍රධාන මහේස්ත්‍රාත් අධිකරණ අංක 07 අධිකරණ පරිශ්‍රය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

හිටපු පාර්ලිමේන්තු මන්ත්‍රී සුජීව සේනසිංහ යන අයට එරෙහිව වත්කම් විමර්ශනයක් සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාවට ලැබුණු පැමිණිල්ලක් විමර්ශනය කිරීමේ දී එයට එරෙහිව සැකකාර මන්ත්‍රීවරයා විසින් අභියාචනාධිකරණය වෙත යොමු කරන ලද රිට් අයදුම්පත 2024.08.29 වන දින ගරු අභියාචනාධිකරණය විසින් නිෂ්ප්‍රභ කර ඇත.