මින්නේරිය ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව හිඟුරක්ගොඩ දිසා අධිකරණයේ දී 2024.07.31 වන දින විභාග වීමට නියමිත නඩුවක් වසර දෙකකින් පසුව අධිකරණයේ කැඳවීමට අවශ්‍ය කටයුතු සලසා දීම වෙනුවෙන් රු. 25,000/- ක මුදලක් අල්ලස් වශයෙන් ඉල්ලා එම මුදල රු. 20,000/- ක් දක්වා අඩුකර ඉල්ලා ලබා ගැනීමේ චෝදනාව මත හිඟුරක්ගොඩ දිසා/මහේස්ත්‍රාත් අධිකරණයේ සිතාසි බෙදන සහ ඇස්කීසි ක්‍රියාත්මක කරන පුද්ගලයා 2024.07.03 වන දින පෙ.ව. 11.20 ට පමණ මින්නේරිය පංචකර්ම රෝහලේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

හන්තාන පාර, මහනුවර ප්‍රදේශයේ පදිංචිකාරියක විසින් කරන ලද පැමිණිල්ලකට අනුව, පැමිණිලිකාරියගේ කැමැත්තෙන් තොරව, ඇය පදිංචි නිවසෙන් කාමර 02කට, ඇයගේ පුතාගේ නමට විදුලිය ලබාගැනීමට කටයුතු කිරීමේ දී විදුලි බලමණ්ඩලයට ග්‍රාම නිලධාරි විසින් ලබාදිය යුතු පදිංචි සහතිකය ලබා නොදී සිටීමට අවශ්‍ය රාජකාරී කටයුතු නොකර සිටීම සඳහා රුපියල් 25,000/=ක (විසිපන්දහසක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත ගඟවටකෝරළය ප්‍රාදේශීය ලේකම් කාර්යාලයේ සේවයේ නියුතු ග්‍රාම නිලධාරීවරයෙකු 2024.06.25 වන දින ප.ව 12.19ට පමණ හිරැස්සගල ග්‍රාම නිලධාරී කාර්යාලය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

ඇහැලියගොඩ, ඇහැලියගොඩවත්ත ප්‍රදේශයේ පදිංචිකරුවකු විසින් කරන ලද පැමිණිල්ලකට අනුව, ඇහැලියගොඩ ප්‍රදේශයේ දමිල මාධ්‍ය පාසලක අධ්‍යාපනය ලබන සිසුන් සඳහා රජයේ ප්‍රතිපත්තියක් මත ලබා දෙන උදෑසන ආහාරය 2024 මාර්තු හා අප්‍රේල් මස සඳහා ලබාදීම වෙනුවෙන් හා එම ටෙන්ඩරය දිගටම කරදරයකින් තොරව පවත්වාගෙන යාමට අවස්ථාව ලබාදීමටත්, ආහාර නිසි පරිදි ලබා දෙන බවට නිර්දේශ කර නියමිත මුදල් ටෙන්ඩර් හිමිකාරියට ලබා දීම වෙනුවෙන් මාස 02 සඳහා රු.50,000/-ක මුදලක් ඉල්ලා, එයින් පළමුව රු.20,000/- මුදලක් ලබාගෙන ඉතිරි රු.30,000/-ක මුදල අල්ලස් වශයෙන් ඉල්ලා ලබා ගැනීමේ චෝදනාව මත ඇහැලියගොඩ දමිල මාධ්‍ය පාසලක විදුහල්පතිවරයෙකු 2024.05.21 වන දින ප.ව 12.43ට පමණ අදාළ විද්‍යාලයේ, විදුහල්පති නිල කාමරය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

රජවැල්ල, කුඹුක්කඳුර ප්‍රදේශයේ පදිංචිකාරියක විසින් කරන ලද පැමිණිල්ලකට අනුව, පැමිණිලිකාරිය ගොනුකර ඇති දික්කසාද නඩුවට අදාළ නඩු තීන්දුව ලබා දී දික්කසාද සහතිකය ලබාදීම සඳහා රුපියල් 4,500/=ක (හාරදහස් පන්සියයක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත උඩදුම්බර,මැදදුම්බර හා පාතදුම්බර (උඩතලවින්න) ක්වාසි උසාවියේ, ක්වාසි විනිසුරුවරයෙකු 2024.05.25 වන දින ප.ව 12.46ට පමණ උඩතලවින්න ක්වාසි උසාවිය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

ඇල්පිටිය ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව රුපියල් 200,000/- ක අල්ලස් මුදලක් ලබා ගැනීමේදී සම්බන්ධව කොට්ටාව පොලිස් ස්ථානයේ පොලිස් සැරයන්වරයෙක්, පොලිස් කොස්තාපල්වරයෙක් සහ හෝමාගම ප්‍රදේශයේ පුද්ගලයෙක් කොට්ටාව මංසන්ධිය අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2024.05.08 දින ප.ව. 7.25 ත් - ප.ව. 8.35 ත් අතර කාලසීමාවේදී අත්අඩංගුවට ගන්නා ලදී.

කොල්ලුපිටිය ප්‍රදේශයේ පිහිටි පැමිණිලිකරු විසින් බලාගන්නා නිවස පරීක්ෂාකර, පැමිණිලිකරුට අයත් රු. එක්කෝටි විසි ලක්ෂයක (රු.12,000,000) ක හා ඩොලර් තුන්දහස් පන්සියයක (3,500)ක මුදලක් (පැමිණිලිකරුට විරුද්ධව විමර්ශනයක් පවතින බව දන්වා) අපරාධ පරීක්ෂණ දෙපාර්තමේන්තුවේ නිලධාරීන් ලෙස සඳහන් කරමින් රැගෙන ගොස් ඇත. පසුව පැමිණ එම නිවසේ සේවයට සිටි ඉන්දියන් ජාතිකයාගේ විදේශ ගමන් බලපත්‍රය රැගෙන ගොස් පසුව පැමිණිලිකරුගේ දුරකතනයට ඇමතුම් ලබා ගෙන ඔහුට විරුද්ධ විමර්ශනයට උදව් කිරීමට සහ රැගෙන යන ලද විදේශ ගමන් බලපත්‍රය නැවත ලබා දීමට රුපියල් කෝටි 04ක් අල්ලස් වශයෙන් ඉල්ලා අදාළ මුදල රුපියල් කෝටි 3 ½ක් දක්වා අඩුකර මුල් කොටස ලෙස රුපියල් කෝටියක (රු.10,000,000) මුදලක් අල්ලස් වශයෙන් ලබා ගැනීම සම්බන්ඳව සැකකරුවන් තිදෙනෙකු හා එක් සැකකාරියක අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් 2024.04.29 වන දින ප.ව. 3.30 ට පමණ කොල්ලුපිටිය ප්‍රදේශයේ පිහිටි අදාළ නිවසේදී අත්අඩංගුවට ගන්නා ලදී.

පුත්තලම, වෙට්ටාලෙයි ප්‍රදේශයේ පදිංචිකාරියක විසින් කරන ලද පැමිණිල්ලකට අනුව, ක්වාසි උසාවියේ ලබා දී ඇති දික්කසාද නඩු තීන්දුවකට අදාළව, දික්කසාද සහතිකය ලබාදීමට අවශ්‍ය කටයුතු සිදු කර, එම සහතිකය ලබා දීම සඳහා රුපියල් 5,000/=ක (පන්දහසක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත පුත්තලම, ක්වාසි උසාවියේ, ක්වාසි විනිසුරුවරයෙකු 2024.04.23 වන දින ප.ව 02.30ට පමණ පුත්තලම, ක්වාසි උසාවිය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි. 

යගිරල ප්‍රදේශයේ පුද්ගලයෙකු විසින් සිදුකරන ලද පැමිණිල්ලකට අනුව රුපියල් 10,000/-ක අල්ලස් මුදලක් ලබා ගැනීම සම්බන්ධව ඉත්තෑපාන පොලිස් ස්ථානයේ සැරයන්වරයෙක් සහ කොස්තාපල්වරයෙක් එම පොලිස් ස්ථානය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2024.02.26 දින ප.ව. 3.40ට පමණ අත්අඩංගුවට ගන්නා ලදී.

ශ්‍රී ලංකා රේගුවේ නිශ්කාෂනය නොවූ මෝටර් රථ ඇතුළු වාහන 400කට ආසන්න ප්‍රමාණයක් ව්‍යාජ ක්‍රම මගින් මෝටර් රථ ප්‍රවාහන දෙපාර්තමේන්තුවේ ලියාපදිංචි කිරීමේ තොරතුරු අල්ලස් හෝ දූෂණ චෝදනා කොමිෂන් සභාව වෙත ලැබීමෙන් පසු ඉන් වාහන 156ක් පිළිබඳව නිශ්චිත තොරතුරු කොමිෂන් සභාවේ විමර්ශන නිලධාරීන් විසින් අනාවරණය කරගන්නා ලදී.

මාතලේ යටවත්ත ප්‍රදේශයේ ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පොලිස් නිලධාරීන් භාරයට ගෙන තිබූ පැමිණිලිකරු ධාවනය කරගෙන යන ලද යතුරුපැදියෙහි බලපත්‍රය කල් ඉකුත්වීම හා වලංගු රියදුරු බලපත්‍රයක් නොමැතිව ධාවනය කිරීම වෙනුවෙන් නීති මඟින් කටයුතු නොකර සිටීමට රු. 100,000/- ක මුදලක් අල්ලස් වශයෙන් ඉල්ලා එම මුදල රු. 50,000/- දක්වා අඩු කර පැමිණිලිකරුගේ කල් ඉකුත් වූ රියදුරු බලපත්‍රය ආපසු ලබා දී එම මුදලින් රු. 10,000/- ක මුදලක් අල්ලස් වශයෙන් ඉල්ලා ලබා ගැනීමේ චෝදනාව මත පොලිස් සැරයන්වරුන් දෙදෙනෙක් මාතලේ, මාදිපොල මාර්ගයේ මිල්ලවාන හන්දිය අසළදී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2024.02.02 දින අත්අඩංගුවට ගන්නා ලදි.

හම්බන්තොට, කටුවැව ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරු දැනට පදිංචිව සිටින නිවසේ ජල හා විදුලි බිල්පත් පැමිණිලිකරුගේ නමට වෙනස් කර ගැනීමට අවශ්‍ය කටයුතු කරදීමට සහ පදිංචිය වෙනස් කරදීම සඳහා රුපියල් 10,000/=ක (දසදහසක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත ග්‍රාම නිලධාරිවරයකු 2024.01.31 දින අදාළ ග්‍රාම නිලධාරී කාර්යාලය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

මෙතෙක් කලක් රාජ්‍ය අංශයේ අල්ලස් හෝ දූෂණ සම්බන්ධව කටයුතු කිරීමට පමණක් පැවති බලතල අභිබවමින් 2023 අංක 09 දරණ දූෂණ විරෝධී පනත මගින් පුද්ගලික අංශයේ අල්ලස් සම්බන්ධයෙන් කටයුතු කිරීමට ද අල්ලස් හෝ දූෂණ චෝදනා විමර්ශන කොමිෂන් සභාවට බලතල හිමිවීය. ඒ අනුව, පුද්ගලික අංශයේ අල්ලස් වරදක් සම්බන්ධයෙන් පළමු වැටලීම 2024.01.26 වන දින කොමිෂන් සභාවේ අනුමැතිය මත සිදු කරන ලදි.