මාතලේ යටවත්ත ප්‍රදේශයේ ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පොලිස් නිලධාරීන් භාරයට ගෙන තිබූ පැමිණිලිකරු ධාවනය කරගෙන යන ලද යතුරුපැදියෙහි බලපත්‍රය කල් ඉකුත්වීම හා වලංගු රියදුරු බලපත්‍රයක් නොමැතිව ධාවනය කිරීම වෙනුවෙන් නීති මඟින් කටයුතු නොකර සිටීමට රු. 100,000/- ක මුදලක් අල්ලස් වශයෙන් ඉල්ලා එම මුදල රු. 50,000/- දක්වා අඩු කර පැමිණිලිකරුගේ කල් ඉකුත් වූ රියදුරු බලපත්‍රය ආපසු ලබා දී එම මුදලින් රු. 10,000/- ක මුදලක් අල්ලස් වශයෙන් ඉල්ලා ලබා ගැනීමේ චෝදනාව මත පොලිස් සැරයන්වරුන් දෙදෙනෙක් මාතලේ, මාදිපොල මාර්ගයේ මිල්ලවාන හන්දිය අසළදී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් 2024.02.02 දින අත්අඩංගුවට ගන්නා ලදි.

හම්බන්තොට, කටුවැව ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරු දැනට පදිංචිව සිටින නිවසේ ජල හා විදුලි බිල්පත් පැමිණිලිකරුගේ නමට වෙනස් කර ගැනීමට අවශ්‍ය කටයුතු කරදීමට සහ පදිංචිය වෙනස් කරදීම සඳහා රුපියල් 10,000/=ක (දසදහසක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත ග්‍රාම නිලධාරිවරයකු 2024.01.31 දින අදාළ ග්‍රාම නිලධාරී කාර්යාලය තුළ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

මෙතෙක් කලක් රාජ්‍ය අංශයේ අල්ලස් හෝ දූෂණ සම්බන්ධව කටයුතු කිරීමට පමණක් පැවති බලතල අභිබවමින් 2023 අංක 09 දරණ දූෂණ විරෝධී පනත මගින් පුද්ගලික අංශයේ අල්ලස් සම්බන්ධයෙන් කටයුතු කිරීමට ද අල්ලස් හෝ දූෂණ චෝදනා විමර්ශන කොමිෂන් සභාවට බලතල හිමිවීය. ඒ අනුව, පුද්ගලික අංශයේ අල්ලස් වරදක් සම්බන්ධයෙන් පළමු වැටලීම 2024.01.26 වන දින කොමිෂන් සභාවේ අනුමැතිය මත සිදු කරන ලදි.

මරදමුනේ ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරු විසින් පදිංචි ලිපිනයේ පවත්වාගෙන යනු ලබන හෝටලයේ සේවකයින්ට අර්ථසාධක අරමුදල් නොගෙවා හෝටලය කරගෙන යන බවට පෙත්සමක් අම්පාර කම්කරු කාර්යාලයට ලැබී ඇති බව පවසා, එම ගොණුව සැකකරු විසින් විමර්ශනය කරන බවට දන්වා ඒ සඳහා එම කාර්යාලයේ ප්‍රධානියාට පවසා නීති මගින් කටයුතු නොකර, උදව්කර දීම සඳහා රුපියල් 10,000/= ක (දහදාහක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත කම්කරු නිලධාරියකු 2014.01.18 වන පැය 18.44ට පමණ මරදමුනේ අල් කයාම් හෝටලය ඉදිරිපිට දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

නාරම්මල ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරුගේ නිවස පරීක්ෂා කර අත්අඩංගුවට ගන්නා ලද නීති විරෝධී මත්පැන් වන කසිප්පු, නඩු නොදමා අඩු ප්‍රමාණයකට නඩු පැවරීම වෙනුවෙන් සහ ඉදිරියට කසිප්පු විකිණීමේ කටයුතු සිදු කරගෙන යන ලෙස දන්වා, ඒ සඳහා නීති මගින් කටයුතු නොකර සිටීමට යැයි පවසා රුපියල් 10,000/= ක (දහදාහක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත උප පොලිස් පරීක්ෂකවරයෙකු සහ පොලිස් කොස්තාපල්වරයෙකු 2024.01.16 වන පැය 18.40ට පමණ නාරම්මල ප්‍රදේශයේ පිහිටි පැමිණිලිකරුගේ නිවසේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.

ගරු ජනාධිපති රනිල් වික්‍රමසිංහ මැතිතුමන් විසින් අල්ලස් හෝ දූෂණ චෝදනා විමර්ශන කොමිෂන් සභාව සඳහා 2023 දෙසැම්බර් මස 21 දිනැතිව නව සාමාජිකයන් පත්කරන ලදී.

කළුතර දිසා අධිකරණයේ කාර්යාල කාර්ය සහයකයකු 2023.12.05 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

කඳාන පොලිස්ථානයේ දූෂණ විමර්ශන අංශයේ ස්ථානාධිපති ලෙස සේවය කරන පොලිස් පරීක‍්ෂකවරයෙකු අල්ලස් ලෙස රුපියල් හැත්තෑපන්දහසක (රු.75,000/=) මුදලක් ලබාගැනීමේ චෝදනාව මත 2023.11.30 දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී,

කල්මුණේ මූලස්ථාන පොලිස් ස්ථානයට අනුයුක්තව රාජකාරී කරන ලැබූ උප පොලිස් පරීක්ෂකවරයකු ලිංගික අල්ලස් ලබා ගැනීමේ චෝදනාව මත 2023.11.22 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

මධ්‍යම පරිසර අධිකාරියේ සභාපතිවරයා සහ තවත් අතරමැදියන් දෙදෙනෙකු 2023.11.10 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

සියඹලාණ්ඩුව ප්‍රදේශයේ පුද්ගලයකු විසින් සිදු කරන ලද පැමිණිල්ලකට අනුව රු. 50,000/- ක මුදලක් අල්ලස් ලෙස ඉල්ලා ලබා ගැනීමේ චෝදනාව මත, වන සංරක්‍ෂණ දෙපාර්තමේන්තුවට අයත් මොරාන බීට්ටු වන කාර්යාලයේ සේවය කරනු ලබන බීට්ටු වන නිලධාරියකු 2023.11.09 වන දින අල්ලස් හෝ දුෂණ චෝදනා විමර්ශන කොමිෂන් සභාවේ විමර්ශන නිලධාරින් විසින් අත්අඩංගුවට ගනු ලැබීය.

අල්ලස් කොමිෂන් සභාවට ලද පැමිණිල්ලකට අනුව රු. 80,000/- ක මුදලක් අල්ලස් ලෙස ඉල්ලා ලබා ගැනීමේ චෝදනාව මත, ශ්‍රී ලංකා ගමනාගමන මණ්ඩලයේ ප්‍රධාන කාර්යාලයේ සේවය කළ හිටපු ක්‍රීඩා අධීක්‍ෂණ නිලධාරියකු 2023.10.05 වන දින අල්ලස් හෝ දුෂණ චෝදනා විමර්ශන කොමිෂන් සභාවේ විමර්ශන නිලධාරින් විසින් අත්අඩංගුවට ගනු ලැබීය.