නිකවැරටිය පොලිස් ස්ථානයේ සැරයන්වරයකු විසින් කරන ලද පැමිණිල්ලකට අනුව, පැමිණිලිකරු රාජකාරි කරනු ලබන නිකවැරටිය මූලස්ථාන පොලිස් ස්ථානයේ නොවිසඳුණු අපරාධ විමර්ශන අංශය මඟින් සිදු කරනු ලබන ගව සොරකම් කිරීමේ සිද්ධියකට අදාළව අවශ්‍ය කරනු ලබන සැකකරුවන් දෙදෙනෙකු එම අපරාධයේ සැකකරුවන් ලෙස නම් නොකර සාක්ෂිකරුවන් වශයෙන් නම් කරන ලෙසට ඉල්ලා ඒ වෙනුවෙන් රු. 20,000/- ක (රුපියල් විසිදහසක) මුදලක් අල්ලස් වශයෙන් පිරිනැමීම සහ එයට ආධාර අනුබල දීම යන චෝදනා මත දඹදෙණිය සහ අලව්ව ප්‍රදේශයේ පදිංචි සිවිල් පුද්ගලයින් දෙදෙනෙකු 2025.03.06 වන දින ‌ප.ව.4.00 ට පමණ නිකවැරටිය පොලිස් ස්ථානය ඉදිරිපිට ඇති ග්‍රොසරි වෙළඳසැලක් තුළ දී හා පොලිස් ස්ථානයේ ප්‍රධාන ගේට්ටුව අසල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

සිත්තාන්ඩි ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, තුරුක්කනාමඩු ප්‍රදේශයේ පිහිටි පැමිණිලිකරුගේ බිරිඳගේ නමින් ඇති අක්කර 3 ක කුඹුරු ඉඩම සඳහා වගා හානි සිදු වූ බවට සැකකරු වන සංවර්ධන නිලධාරියා විසින් ම පවසා, ඉහත කුඹුරට වන්දි මුදල් ගෙවීමට අවශ්‍ය කටයුතු ඔහු විසින් ම සිදු කර දී, එම වන්දි මුදල් බැංකුගත කිරීමට කටයුතු කිරීම වෙනුවෙන් රු.50,000/=ක මුදලක් සැකකරු විසින් ඉල්ලා, එයින් රු.40,000/= ක මුදලක් අල්ලස් වශයෙන් ඉල්ලා, ලබාගත් වන්දාරුමුලෛ ගොවිජන සේවා මධ්‍යස්ථානයේ සංවර්ධන නිලධාරියෙකු 2025.03.05 වන දින ‌පෙ.ව.9.44 ට පමණ චෙන්කල්අඩි ලංකා බැංකුව ඉදිරිපිට දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

ගල්නෑව ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරු මිල දී ගන්නා ලද ගොයම් කපන යන්ත්‍රය (සුනාමි) මිල දී ගන්නා ලද පුද්ගලයාගේ නොවන බව පවසා එයට එරෙහිව නීති මඟින් කටයුතු නොකර සමථයක් කර, එම යන්ත්‍රය මිල දී ගත් මුදල නැවත ලබා ගැනීමට අවශ්‍යය කටයුතු කර දීමටත් පරණ යකඩ ව්‍යාපාරය කරදරයකින් තොරව ඉදිරියට කර ගෙන යාමට අවස්ථාව සලසා දීම සඳහා රු.30,000/- ක අල්ලස් මුදලක් තුටු පඬුරක් ලෙස ඉල්ලීම සහ එම මුදල තුටු පඬුරක් ලෙස ඉල්ලීමට ආධාර අනුබල දීම හා එම මුදල් ලබා ගැනීමට සහාය වීම යන අල්ලස් චෝදනා මත ගල්නෑව පොලිස් ස්ථානයේ උප පොලිස් පරීක්ෂකවරයෙකු සහ පොලිස් කොස්තාපල්වරයෙකු 2025.03.01 වන දින ‌පෙ.ව.11.55 ට සහ පෙ.ව.11.58 පමණ ගල්නෑව පොලිස්ථානයේ ආසන්නයේ ප්‍රධාන මාර්ගයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

ගිරිබාව ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරු විවාහ වී සිට දැනට ඔහුව අතහැර ගොස් සිටින තම බිරිඳට විරුද්ධව පැමිණිලිකරු විසින් පවරන ලද වන්දි නඩුවට අදාළව බිරිඳට විරුද්ධව ඇති වරෙන්තුව ක්‍රියාත්මක කර, බිරිඳ අධිකරණයට ඉදිරිපත් කිරීමට කටයුතු කර දීම මඟින් හිඟ වන්දි මුදල් ලබා ගැනීමට උදව් කර දීම වෙනුවෙන් රු. 20,000/- ක (රුපියල් විසිදහසක) අල්ලස් මුදලක් ඉල්ලා එකී මුදල ලබා නොදුනහොත් පැමිණිලිකරුට විරුද්ධව යම් නීති විරෝධී කටයුත්තක් සම්බන්ධ කර නඩු පවරා සිරගත කිරීමට කටයුතු කරන බව පවසා, එය සිදු නොකර සිටීමට රු.20,000/=ක මුදලක් අල්ලස් වශයෙන් ඉල්ලා, ලබාගත් ගිරිබාව පොලිස් ස්ථානයේ පොලිස් සැරයන්වරයෙකු 2025.01.24 දින ප.ව.1.22 ට පමණ පැමිණිලිකරුගේ නිවසේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

ගල්කිස්ස ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරු විසින් පවත්වාගෙන යනු ලබන ආයතනයේ සේවකයින්ට මාසිකව ගෙවනු ලබන මූලික වැටුප රුපියල් පන්දහසකින් වැඩි කළ යුතු බවත්, එම වැඩි කළ මුදලට අදාළව රජයට ගෙවිය යුතු සේවක අර්ථසාධක මුදල් ගෙවිය යුතු බවත්, මෙම ආයතනය සම්බන්ධයෙන් පෙර වැරදි ඇති බවත් දන්වා ඒ සම්බන්ධයෙන් උසස් නිලධාරීන් දැනුවත් කර නීති මඟින් කටයුතු නොකර සිටීම සඳහා සහ විමර්ශන කටයුතු සඳහා භාරයට ගත් ලේඛන නැවත ලබාදීම සඳහා රු. 250,000/- ක (දෙලක්‍ෂ පනස්දහසක) මුදලක් අල්ලස් වශයෙන් ඉල්ලා ලබා ගැනීමේ චෝදනාව මත කම්කරු දෙපාර්තමේන්තුවේ, බටහිර කොළඹ දිස්ත්‍රික් ලේකම් කාර්යාලයේ කම්කරු නිලධාරියෙකු 2025.01.22 වන දින ප.ව. 1.55 ට පමණ ගල්කිස්ස, ගාලු පාර, ටෙම්පල්ස් පාර හන්දිය අසල පිහිටි රාජ්‍ය ඖෂධ නීතිගත සංස්ථාව ඉදිරිපිට දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

නල්ලූර් උතුර, යාපනය ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව වීසා නොමැතිව ශ්‍රී ලංකාව තුළ රැඳී සිටීමේ වරදට අත්අඩංගුවට ගන්නා ලද පැමිණිලිකරු, වැලිසර ආගමන විගමන රැදවුම් මධ්‍යස්ථානයෙන් නිදහස් කර දීමට අවශ්‍ය කටයුතු කර දීමට රු. 500,000/- ක මුදලක් අල්ලස් වශයෙන් ඉල්ලා ලබා ගැනීමේ චෝදනාව මත ආගමන විගමන දෙපාර්තමේන්තුවේ වැලිසර රැදවුම් මධ්‍යස්ථානයේ සේවයේ නියුතු ආගමන විගමන බලයලත් නිලධාරීවරයෙක් 2025.01.20 වන දින ප.ව. 4.42 ට පමණ ආගමන විගමන දෙපාර්තමේන්තුවේ වැලිසර රැදවුම් මධ්‍යස්ථානය තුල දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

ලියන්නවත්ත වලගෙදර ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව පැමිණිලිකරු 2025.01.14 වන දින ලොරි රථයකින් මතුගම නගරයේ සිට අගලවත්ත ප්‍රදේශයට යමින් සිටියදී එම මාර්ගයේ මතුගම ක්‍රිස්තියානි පල්ලිය අසලදී සැකකරු විසින් ලොරි රථය නවතා බලපත්‍ර පරික්ෂා කළ අවස්ථාවේ දී පැමිණිලිකරුගේ රියදුරු බලපත්‍රයේ බර වාහන පන්තියට අදාළ කාල සීමාව කල් ඉකුත්වී තිබූ බැවින් රියදුරු බලපත්‍රය සැකකරු භාරයට ගෙන නීති මගින් කටයුතු නොකර නැවත රියදුරු බලපත්‍රය රියදුරුට (පැමිණිලිකරුට) ලබා දීම සඳහා රු. 5,000/- ක මුදලක් ඉල්ලා එකී මුදලින් රු. 3,000/- ක මුදලක් අල්ලස් වශයෙන් ඉල්ලා ලබා ගැනීමේ චෝදනාව මත මතුගම මූලස්ථාන පොලිසියේ පොලිස් සැරයන්වරයෙක් 2025.01.15 වන දින ප.ව. 7.15 ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

කොස්ගම ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව පැමිණිලිකරුට අයත් වෙළෙඳසැලේ 2025 වර්ෂයට අදාළ වාර්ෂික වෙළෙඳ බලපත්‍රය ලබාදීමට අවශ්‍ය කටයුතු සළසා දීම සදහා රු. 1170/- ක් වටිනා කුකුළු මස් කිලෝ එකක් අල්ලස් වශයෙන් ඉල්ලා ලබා ගැනීම මත මීරිගම ප්‍රාදේශීය සභාවේ වේවැල්දෙණිය උප කාර්යාලයේ සේවය කළ ආදායම් නිලධාරීවරයෙක් (වැඩ බලන) සහ මීරිගම ප්‍රාදේශීය සභාවේ මාර්ග අංශයේ සේවය කළ ක්ෂේත්‍ර කම්කරුවරයෙක් 2024.12.24 වන දින ප.ව. 1.00 ට පමණ පැමිණිලිකරුගේ වෙළෙඳසැල ඉදිරිපිට දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

කෝට්ටේ මාදිවෙල ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව පැමිණිලිකරුගේ නැන්දනියකට අයත් ටොරිංටන් ඇවෙනිව් ප්‍රදේශයේ පිහිටි ඉඩමක් නාගරික සංවර්ධන අධිකාරියට පවරා ගැනීමෙන් අනතුරුව එම ඉඩමට වන්දි ගෙවීම සදහා අවශ්‍ය කටයුතු කරදීම වෙනුවෙන් රුපියල් ලක්ෂ 90 ක මුදලක් අල්ලස් වශයෙන් ඉල්ලා ලබා ගැනීම හා ඊට ආධාර අනුබල ලබාදීම මත මහරගම සහ ගොතටුව ප්‍රදේශයේ පදිංචි ව්‍යාපාරිකයන් දෙදෙනෙක් 2024.12.27 වන දින ප.ව. 3.08 ට පමණ පිට කෝට්ටේ පිහිටි වෙළඳසැලක් ඉදිරිපිට දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

තඹලගමුව ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව පැමිණිලිකරු විසින් මුදල් ආරවුලක් සම්බන්ධයෙන් ත්‍රිකුණාමලය පොලිස් ස්ථානයට කර ඇති පැමිණිල්ල විභාග කර පැමිණිලිකරුට අයවීමට ඇති මුදල් ලබා ගැනීමට අවශ්‍ය කටයුතු කරදිය හැකි බව පවසා ඒ වෙනුවෙන් රුපියල් 5,000/- ක මුදලක් අල්ලස් වශයෙන් ඉල්ලා ලබා ගැනීම මත ත්‍රිකුණාමලය පොලිස් ස්ථානයේ විවිධ පැමිණිලි විමර්ශන අංශයට අනුයුක්තව ප්‍රජා පොලිස් ඒකකයේ සේවය කළ පොලිස් සැරයන්වරයෙක් 2024.12.23 වන දින ප.ව. 2.13 ට පමණ ත්‍රිකුණාමලය පොලිස් ස්ථානයේ නිලධාරීන්ට ආහාර ගැනිමට ඇති විවේක කාමරය ඉදිරිපිට දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

ගොනාගොල්ල ප්‍රදේශයේ පුද්ගලයෙකු විසින් කරන ලද පැමිණිල්ලකට අනුව, පැමිණිලිකරු විසින් සමන්ගල රක්‍ෂිතයට අයත් කොටසකින් අනවසරයෙන් වැලි ගොඩ දැමීම සම්බන්ධයෙන් සහ එම රක්‍ෂිතයට අයත් කොටසක ගව ගාලක් පවත්වා ගෙන යාම සම්බන්ධයෙන් නිත්‍යානුකූලව කටයුතු නොකර සිටීම සඳහා පළමු සැකකරුවන බීට්ටු වන නිලධාරිවරයා විසින් රු. 40,000/- ක් සහ දෙවන සැකකරුවන වන කේෂත්‍ර සහකාරවරයා විසින් රු. 60,000/- ක අල්ලස් මුදලක් ඉල්ලා ලබාගැනීමේ චෝදනාව මත අම්පාර වන නිලධාරී කාර්යාලයේ සේවයේ නියුතු මෙම නිලධාරීන් දෙදෙනා 2024.12.18 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදී.

වීරවිල, පන්නේනේගමුව ප්‍රදේශයේ පදිංචි පැමිණිලිකරුවෙකු විසින් සිදු කරන ලද පැමිණිල්ලකට අනුව, පැමිණිලිකරුගේ විදේශ ගමන් බලපත්‍රය ලබා ගැනීම සඳහා ඔහු විසින් රජයේ ගාස්තු ලෙස රු.10,000/= (රුපියල් දසදහස) ක් ගෙවා 2024.07.30 වන දින අදාල ලියකියවිලි භාර දී ඇති අතර, විදේශ ගමන් බලපත්‍රය ලබා ගැනීමට 2024.12.12 වන දින එම දෙපාර්තමේන්තුවට ගිය අවස්ථාවේ දී පැමිණිලිකරුගේ විදේශ ගමන බලපත්‍රය සකස් කර ලබා දීමට රු.6,000/=ක මුදලක් අල්ලස් වශයෙන් ඉල්ලා ලබා ගැනීමේ චෝදනාව මත ආගමන හා විගමන දෙපාර්තමේන්තුවේ කාර්යාල සේවක සේවයේ 1වන ශ්‍රේණියේ සේවකයෙකු 2024.12.12 වන දින ප.ව.1.45ට පමණ ආගමන හා විගමන දෙපාර්තමේන්තුවේ 2 වන මහගේ පිහිටි තැපැල් අංශයේ දී අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරීන් විසින් අත්අඩංගුවට ගන්නා ලදි.