අල්ලස් කොමිෂන් සභාවට ලද පැමිණිල්ලකට අනුව රු. 30,000/- ක මුදලක් අල්ලස් ලෙස ලබා ගැනීමේ චෝදනාව මත ඉපලෝගම පොලිස් ස්ථානයේ දූෂණ මර්ධන අංශයේ ස්ථානාධිපති ලෙස කටයුතු කළ උප පොලිස් පරීක්‍ෂකවරයකු හා පොලිස් කොස්තාපල්වරයකු 2022.12.08 වන දින අල්ලස් හෝ දුෂණ චෝදනා විමර්ශන කොමිෂන් සභාවේ විමර්ශන නිලධාරින් විසින් අත්අඩංගුවට ගනු ලැබීය.
නීති විරෝධී මත්පැන් ව්‍යාපාරයක් හේතුවෙන් අත්අඩංගුවට ගෙන පොලිස් ඇප මත මුදාහැර සිටින පැමිණිලිකරුගේ සහෝදරයා හට නීති මගින් කටයුතු නොකර සිටීමට හා ඉදිරියේදීත් එම කටයුතු සඳහා නීති මගින් කටයුතු නොකර, පැමිණිලිකරුගේ හා සහෝදරයාගේ පෙර වැරදිද සඳහන් නොකර, නීති විරෝධී මත්පැන් ව්‍යාපාරය ඉදිරියටත් කරගෙන යාමට උදව් කිරීම සඳහා පොලිස් කොස්තාපල්වරයා මාර්ගයෙන් රු.30,000/- ක මුදලක් අල්ලස් වශයෙන් ඉල්ලා ලබා ගන්නා අවස්ථාවේදී, අදාළ උප පොලිස් පරීක්‍ෂකවරයා ඉපලෝගම පොලිස් ස්ථානය තුළදී අත්අඩංගුවට ගෙන ඇත. එමෙන්ම, උප පොලිස් පරීක්‍ෂකවරයා හට ආධාර අනුබල දෙමින් එම රු.30,000/= මුදල අල්ලස් වශයෙන් ලබා ගැනීමේදී, ඉහත සැකකාර පොලිස් කොස්තාපල්වරයා පැමිණිලිකරුගේ නිවස ඉදිරිපිටදී අත්අඩංගුවට ගෙන ඇත.
