පුත්තලම දිසා/මහේස්ත්‍රාත් අධිකරණයට අනුයුක්තව අධිකරණ කළමනාකරණ සහකාරවරයෙක් වශයෙන් සේවය කළ තැනැත්තෙක් රු.4500ක මුදලක් අල්ලස් වශයෙන් ලබා ගැනීමේ වරද නිසා කොළඹ මහාධිකරණය මගින් ඒ තැනැත්තාව වරදකරු කර ඇත.

ඒ අනූව කොළඹ මහාධිකරණ විනිසුරු ගිහාන් කුලතුංග මහතා විසින් චූදිත තැනැත්තාට අවුරුදු 10 ක බරපතල වැඩ ඇති සිර දඬුවම් සහ රු.5000 බැගින් දඩ මුදල් නියම කරන ලදී.
පැමිණිලිකරු පාර්ශවකරුවෙකු වන 23007/16/p2 දරණ නඩත්තු නඩුව ප්‍රකාරව පැමිණිලිකරු විසින් ගෙවිය යුතු රු.12,000/- ක මාසික නඩත්තු මුදල අඩු කරදීමට ආධාර කිරීම සඳහා චූදිත තැනැත්තා විසින් පැමිණිලිකරුගෙන් රු.6000/- ක මුදලක් අයැද පසුව රු.4500/- ක මුදලක් අල්ලස් වශයෙන් ඉල්ලා ඇත. ඒ අනූව පැමිණිලිකරු මේ සම්බන්ධයෙන් අල්ලස් කොමිසමට පැමිණිලි කිරීමෙන් අනතුරුව අල්ලස් කොමිෂන් සභාවේ විමර්ශන නිලධාරීන් වැටලීමක් සංවිධානය කර ඇත.ඒ අනූව චූදිත පැමිණිලිකරුගෙන් අල්ලස් මුදල් ලබා ගන්නා අවස්ථාවේදී අල්ලස් කොමිෂන් සභාවේ විමර්ශන නිලධාරීන් චූදිත තැනැත්තාව අත්අඩංගුවට ගැනීමට කටයුතු කර ඇත.

පැමිණිල්ල මෙහෙය වූ නීතිඥවරිය - එස්.ඒ.භක්ති චේතනා, සහකාර අධ්‍යක්‍ෂ (නීති)
විමර්ශන නිලධාරීන් - උ.පො.ප. සෙනෙවිරත්න, පො.කො.28992 මධුශංක