ශ්‍රී ලංකා රේගුවේ නිශ්කාෂනය නොවී මෝටර් රථ ප්‍රවාහන දෙපාර්තමේන්තුවේ ලියාපදිංචි කළ වාහන සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් සිදු කරගෙන යනු ලබන විමර්ශන කටයුතුවලට අදාළව, ටොයෝටා ලෑන්ඩ් කෘෂර් වර්ගයේ රථයක් සම්බන්ධයෙන් ද විමර්ශන කටයුතු සිදු කරන ලදි.

මෙලෙස ශ්‍රී ලංකාවට අනීතිකව ආනයනය කරන ලද වාහනයක්, මෝටර් රථ ප්‍රවාහන දෙපාර්තමේන්තුව මගින් පැවරීම් කටයුතු සිදුකිරීමට අනුමැතිය ලබාදීම යන චෝදනාව යටතේ රඹුක්කන ප්‍රදේශයේ පදිංචි, මෝටර් රථ ප්‍රවාහන දෙපාර්තමේන්තුවේ හම්බන්තොට කාර්යාලයේ රාජකාරි සිදු කළ (මේ වන විට වැඩ තහනමට ලක්ව ඇති) නියෝජ්‍ය කොමසාරිස්වරයෙකු කොමිෂන් සභාවේ නිලධාරීන් විසින් 2025.02.05 වන දින ප.ව.2.30ට පමණ අල්ලස් හෝ දූෂණ චෝදනා විමර්ශන කොමිෂන් සභාවේ දී අත්අඩංගුවට ගන්නා ලදි.

ඒ අනුව, 2025.02.05 වන දින සැකකරු කොළඹ ප්‍රධාන මහේස්ත්‍රාත් අධිකරණයට ඉදිරිපත් කිරීමෙන් අනතුරුව රු.25,000/- ක මුදල් ඇප හා ලක්ෂ 05 බැගින් වූ ශරීර ඇප 05ක් මත මුදා හැර ඇත. තව ද, අදාළ චූදිතගේ විදේශ ගමන් ද මේ වන විට තහනම් කර ඇත.

මෙම චූදිත විසින් බස් රථ තුනක් සඳහා පරම අයිතිය වෙනස් කර පවරා ගැනිමේ කටයුතු සඳහා අල්ලස් ඉල්ලා ලබාගැනීමේ චෝදනාවකට අදාළව සිදු කරන ලද වැටලීමක දී 2024.10.04 වන දින අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් අත්අඩංගුවට ගන්නා ලද අතර, ඒ සම්බන්ධ විමර්ශන කටයුතු මේ වන විට සිදු කෙරෙමින් පවතී.