අල්ලස් කොමිෂන් සභාවට ලද පැමිණිල්ලකට අනුව, රුපියල් 5000/= ක මුදලක් අල්ලස් ලෙස ඉල්ලා ලබා ගැනීමේ චෝදනාව මත, රත්මලාන ප්‍රාදේශීය ලේකම් කාර්යාලයට අනුයුක්තව සේවය කරන ග්‍රාම නිලධාරිවරයකු 2022.04.28 වන දින අල්ලස් හෝ දූෂණ චෝදනා විමර්ශන කොමිෂන් සභාවේ විමර්ශන නිලධාරින් විසින් අත්අඩංගුවට ගන්නා ලදී.
පැමිණිලිකරු විසින් පවත්වාගෙන යනු ලබන ගොඩනැගිලි ඉදිකිරීමේ ව්‍යාපාරයට විදේශ රටවලින් අමුද්‍රව්‍ය ආනයනය කිරීම වෙනුවෙන් අවශ්‍ය පදිංචිය සනාථ කිරීමේ ලේඛනය අත්සන් කර දීම සඳහා සැකකාර නිලධාරියා විසින් එම අල්ලස් මුදල ලබා ගන්නා අවස්ථාවේදී, බණ්ඩාරනායක මාවත, සරණංකර පාර, කළුබෝවිල ලිපිනයේ පිහිටි ජේසන් මහල් නිවාස අසලදී මෙලෙස අත්අඩංගුවට පත් විය.
