ශ්‍රී ලංකා රේගුවේ නිශ්කාෂනය නොවූ මෝටර් රථ ඇතුළු වාහන 400කට ආසන්න ප්‍රමාණයක් අනීතික ලෙස මෝටර් රථ ප්‍රවාහන දෙපාර්තමේන්තුවේ දත්ත පද්ධතියට ඇතුළත් කොට ලියාපදිංචි කර ඇති බවට ලැබුණු තොරතුරු මත, අල්ලස් හෝ දූෂණ චෝදනා විමර්ශන කොමිෂන් සභාව විසින් අධිකරණයට කරුණු ඉදිරිපත් කිරීමෙන් අනතුරුව, එම වාහන අතරින් වාහන 168ක පැවරීම් කටයුතු අත්හිටුවීම සඳහා මෝටර් රථ ප්‍රවාහන කොමසාරිස් ජනරාල් වෙත ගරු අධිකරණයෙන් නියෝග ලබා දී ඇත.

එලෙස නියෝග ලබා දුන් වාහන 168 අතරින් වාහන හයක් (06), 2024.06.05 දින සහ 2024.06.06 දිනයන්හි දී අදාළ වාහනවල වර්තමාන හිමිකරුවන්ගේ භාරයෙන් කොමිෂන් සභා භාරයට ගන්නා ලදී. (මෙම වාහනවලට අදාළ ඡායාරූප කොමිෂන් සභා නිල වෙබ් අඩවියේ දක්වා ඇත. https://sinhala.ciaboc.gov.lk/media-centre/latest-news/1122-2024-06-08-06-11-33)

මෙම වාහන 6න් රජයට කෝටි 10කට ආසන්න පාඩුවක් සිදුව ඇති අතර, වරදකරුවන්ට එරෙහිව විමර්ශන කඩිනමින් අවසන් කර, වරදකරුවන්ට එරෙහිව අවශ්‍ය නීතිමය පියවර ගැනීමට කොමිෂන් සභාව කටයුතු කරමින් සිටී.