රාජ්‍ය පාලනය හා විනිවිදභාවය සවිමත් කිරීමේ දැවැන්ත පියවරක් වශයෙන්, ජාතික දූෂණ විරෝධී සුපිලිපන්නතා ඇගයීම් රාමුව හඳුන්වා දීම හා සියලු රාජ්‍ය ආයතන තුල අභ්‍යන්තර කටයුතු ඒකක ස්ථාපිත කිරීම පිලිබඳ ව රාජ්‍ය නිලධාරීන් දැනුවත් කිරීමේ සැසියක් ජනාධිපති ලේකම් කාර්යාලය හා අල්ලස් හෝ දූෂණ චෝදනා කොමිෂන් සභාව එක්ව පවත්වන ලදි. මෙම රාමුව පිලිබඳ ව රාජ්‍ය නිලධාරීන් දැනුවත් කර එය වඩාත් ඵලදායී ව ක්‍රියාවට නැංවීම සඳහා කල යුතු වැඩි දියුණු කිරීම සම්බන්ධයෙන් ඔවුන් ගේ අදහස් ලබා ගැනීම මෙම සැසියේ අරමුණ විය.
මෙම යෝජිත ජාතික සුපිලිපන්නතා ඇගයීම් රාමුව ක්‍රියාවට නැංවීම අංක PS/SP/Circular/02/2025 දරන ජනාධිපති චක්‍රලේඛය මගින් ස්ථාපිත කල අභ්‍යන්තර කටයුතු ඒකක යටතේ සිදු කෙරෙනු ඇත. රාජ්‍ය අංශය තුල වූ දූෂණය මැඩලීමත්, විනිවිදභාවය ඉහළ නැවීමත්, වගවීම තහවුරු කිරීමත්, කාර්යක්ෂමතාව ඉහළ නැවීමත් මෙම වැඩපිලිවෙල තුලින් අපේක්ෂා කෙරේ.
ජාතික දූෂණ විරෝධී සුපිලිපන්තා ඇගයීම් රාමුවේ මූලික ලක්ෂණ:
- ආයතනික දූෂණ විරෝධී ක්‍රියාකාරී සැලැස්මක් සකස් කිරීම
- දූෂණ අවදානම් හඳුනා ගෙන ඒවා අඩු කිරීම සඳහා දූෂණ අවදානම් තක්සේරුවක් සිදු කිරීම.
- සුපිලිපන්නබව, සදාචාරාත්මක පාලනය හා තොරතුරු හුවමරුව ප්‍රවර්ධණය කිරීම.
- අල්ලස් හෝ දූෂණ චෝදනා කොමිෂන් සභාවේ දී කාලාන්තර සමාලෝචන පැවැත්වීම.
- අභ්‍යන්තර කටයුතු ඒකකවල ප්‍රගතිය අධීක්ෂණය කිරීම සඳහා වාර්තා කිරීමේ ඩිජිටල් වේදිකාවක් ක්‍රියාත්මක කිරීම.
- වත්කම් ප්‍රකාශ කිරීමේ අවශ්‍යතා සමග අනුකූල වීම ද බැඳීම් අතර පිලිගැටුම් කලමණාකරණය ද තහවුරු කිරීම.
- සදාචාරාත්මක පාලනය සඳහා ප්‍රතිපත්ති ඇති කිරීම සහ චර්යා ධර්ම සංග්‍රහ අනුගමනය කිරීම.
ජනාධිපති ලේකම් ආචාර්ය නන්දික සනත් කුමානායක මහතා, අල්ලස් කොමිෂන් සභාවේ අධ්‍යක්ෂ ජනරාල් රංග ශ්‍රීනාත් දිසානායක මහතා සහ ජනාධිපති ලේකම් කාර්යාලයේ චන්දිමා වික්‍රමසිංහ මහත්මිය යන ප්‍රමුඛ රාජ්‍ය නිලධාරීන් මෙම සැසිය ඇමතූහ.
කැබිනට් ආමාත්‍යාංශ, දෙපාර්තමේන්තු, පලාත් ප්‍රධාන ලේකම් කාර්යාල සහ දිස්ත්‍රික් ලේකම්කාර්යාල නියෝජනය කරමින් රාජ්‍ය නිලධාරීන් 107 දෙනෙක් සහභාගී වූ මෙම සාකච්ඡාව 2025.02.27 වන දින කොළඹ මැන්ඩරිනා හෝටලයේ දී පවත්වන ලදි.
කොරියානු රාජ්‍යයේ සුප්‍රසිද්ධ දූෂණ විරෝධී ක්‍රියාන්විත ඇගයුම පාදක කොට ගනිමින් සකස් කල මෙම ජාතික දූෂණ විරෝධී සුපිලිපන්නතා ඇගයීම් රාමුව, එක්සත් ජාතීන් ගේ සංවර්ධන වැඩසටහන විසින් සහසුකම් සැපයීම තුලින් කොරියන් රජයේ තාක්ෂණික සහය ලබා ගනිමින් සකස් කර ඇත.
රාජ්‍ය අංශය තුල වගවීම හා විනිවිදබව සහිත සංස්කෘතියක් ඇති කිරීම වෙනුවෙන් ශ්‍රී ලංකාවේ කැපවීම මෙම වැඩපිලිවෙල තුලින් ඉස්මතු කෙරේ. පාර්ශවකරුවන් ගේ අදහස් ද ඇතුලත් කිරීම තුලින් මෙම රාමුව පරිපූර්ණව, ප්‍රතිඵලදායී ලෙස හා දේශයේ පාලන අරමුණ සමග එ්ක රේඛීය ව නිර්මාණය වනු ඇත.
මෙම රාමුව අවසන් කොට ක්‍රියාවට නැංවීම තුලින්, දූෂණය පිටුදැකීම සඳහාත් රාජ්‍ය පරිපාලනයේ සියලු තලවල සදාචාරාත්මක පාලනයක් ඇති කිරීම සඳහාත් ශ්‍රී ලංකාව දරනු ලබන ප්‍රයත්නයන් ගේ වැදගත් සන්ධිස්ථානයක් සටහන් කරනු ඇත.
